गौरीफन्टा नाकामा यात्रुसँग बढी भाडा असुल्ने अटोचालक ‍पक्राउ

News Summary

Generated by OK AI. Editorially reviewed.

कैलालीको गौरीफन्टा नाकामा भारतबाट फर्किने क्रममा सुनिता कुमालबाट अस्वभाविक रकम असुल्ने अटो चालकलाई प्रहरीले नियन्त्रणमा लिएको छ।
अटो चालक केशव सिंह रावल र सहयोगी भूगालीराम चौधरीले कुमाललाई गौरीफन्टा नाकाबाट धनगढी बसपार्कसम्म १५०० भारतीय रूपैयाँ लिएको स्वीकारेका छन्।
जिल्ला प्रहरी कार्यालयले दुवै जनालाई नियन्त्रणमा लिएर थप अनुसन्धान गरिरहेको र रकम फिर्ता गराइने तयारी रहेको जनाएको छ।

२९ चैत, धनगढी । कैलालीको गौरीफन्टा नाकामा आइतबार बिहान भारतबाट फर्किने क्रममा बाजुराको बूढीगंगा नगरपालिका-८ कि सुनिता कुमालबाट चोकिएको दर भन्दा अस्वभाविक रकम असुल्ने अटो चालकलाई प्रहरीले नियन्त्रणमा लिएको छ ।

जिल्ला ट्राफिक प्रहरी कार्यालयको टोलीले अटो चालक केशव सिंह रावल र उनका सहयोगी भूगालीराम चौधरीलाई नियन्त्रणमा लिएको हो ।

ट्राफिक प्रहरी निरीक्षक रेशमप्रसाद आचार्यले दुवै जनालाई नियन्त्रणमा लिएर थप कारवाहीका लागि जिल्ला प्रहरी कार्यालयको जिम्मा लगाइएको बताए ।

उनकाअनुसार दुवै जनाले कुमालबाट गौरीफन्टा नाकाबाट धनगढी बसपार्कसम्म पुर्‍याएबापत एक हजार पाँच सय भारतीय रूपैयाँ लिएको स्वीकारेका छन् । उनीहरूले कुमालको झोला पारी गौरीफन्टा नाकाबाट वारीसम्म बोकेर ल्याएकोसमेत गरेर उक्त रकम लिएको बताएका छन् ।

जिल्ला प्रहरी कार्यालयका प्रवक्ता प्रहरी नायब उपरीक्षक(डीएसपी) योगेन्द्र तिमिल्सिनाले दुवै जनालाई नियन्त्रणमा लिएर थप अनुसन्धान भइरहेको बताए ।

उनकाअनुसार भारतबाट फर्किएका पीडित बाजुरा हिडिसकेका कारण कारबाहीका लागि जाहेरी भने परेको छैन् तर उनीहरूले असुली गरेको रकम सम्बन्धित पक्षलाई फिर्ता गराइनेछ ।

उजुरी आएको खण्डमा थप कारबाही अघि बढाउने र अन्यथा सम्झाइबुझाइ गरेर छाड्ने प्रहरीको तयारी छ ।