दुग्ध विकास बोर्डको औचित्य प्रमाणित गर्न कृषिमन्त्री चौधरीको निर्देशन

News Summary

Generated by OK AI. Editorially reviewed.

कृषि, वन तथा वातावरणमन्त्री गिता चौधरीले राष्ट्रिय दुग्ध विकास बोर्डको अध्यक्षका रूपमा पदभार ग्रहण गर्दै दुग्ध क्षेत्रको विकासका लागि निर्देशन दिइन् ।
मन्त्री चौधरीले स्थापनाकालदेखि नै बोर्डले अपेक्षा अनुसार काम गर्न नसकेको र आफ्नो औचित्य प्रमाणित गर्न संघर्ष गरिरहेको बताइन् ।
उनले ‘बोर्डको पुनर्संरचनासँगै दुग्ध क्षेत्रको विकासमा प्रभावकारी योगदान पुग्ने मेरो अपेक्षा छ’ भनिन् ।

२६ जेठ, काठमाडौं । कृषि, वन तथा वातावरणमन्त्री गिता चौधरीले राष्ट्रिय दुग्ध विकास बोर्डलाई दुग्ध क्षेत्रको समग्र विकासका लागि सक्रिय भूमिका निर्वाह गर्न निर्देशन दिएकी छिन् ।

बोर्ड अध्यक्षका रूपमा पदभार ग्रहण गर्दै मन्त्री चौधरीले दुग्ध क्षेत्रको प्रवर्द्धनका लागि सरकारलाई नीतिगत सुझाव दिनुका साथै उत्पादन, उपभोग, गुणस्तर र बजार व्यवस्थापनमा सुधार ल्याउनुपर्नेमा जोड दिइन् ।

उनले आयात प्रतिस्थापन र निर्यात प्रवर्द्धनमा बोर्डको भूमिका प्रभावकारी हुनुपर्ने बताइन् ।

निजी तथा सरकारी दुग्ध व्यवसायीबीच समन्वय गर्ने र दुग्ध विकास सम्बन्धी अध्ययन गरी ‘डेरी डाटाबेस’ तयार पार्नु बोर्डको प्रमुख जिम्मेवारी भएको उनको भनाइ थियो ।

मन्त्री चौधरीले स्थापनाकालदेखि नै बोर्डले अपेक्षा अनुसार सेवा दिन नसकेको र लामो समयदेखि आफ्नो औचित्य प्रमाणित गर्न संघर्ष गरिरहेको स्वीकार गरिन् ।

‘दुग्ध उत्पादक किसान, सहकारी र निजी क्षेत्रका लागि बोर्ड आवश्यक भए पनि प्रभावकारी भूमिका निर्वाह गर्न नसक्दा समय–समयमा यसको खारेजीको चर्चा हुने गरेको छ,’ उनले भनिन् ।

वर्तमान अवस्थालाई बोर्डका लागि सुनौलो अवसरको रूपमा व्याख्या गर्दै मन्त्री चौधरीले संस्थाको लक्ष्य र उद्देश्यलाई प्राथमिकतामा राखी पुनर्संरचना गर्न निर्देशन दिइन् ।

बोर्ड पुनर्संरचना मार्फत यसको आवश्यकता र औचित्य प्रमाणित हुनेमा उनले विश्वास व्यक्त गरिन् ।

‘बोर्डको पुनर्संरचनासँगै दुग्ध क्षेत्रको विकासमा प्रभावकारी योगदान पुग्ने मेरो अपेक्षा छ,’ उनले थपिन् ।