बंगालको खाडीमा कार्गो जहाज डुब्यो, जहाजमा थिए २० चिनियाँसहित २४ जना

७ भदौ, काठमाडौं । भारतको पूर्वी तट नजिक बंगालको खाडीमा पानामाको झण्डा भएको कार्गो जहाज डुबेको छ । त्यसमा सवार २४ जना चालक दलका सदस्यको खोजी तथा उद्धार अभियान जारी छ ।

‘एमभी ओसन विनर’ नामको उक्त जहाजमा २० जना चिनियाँ, तीन जना म्यानमारका र एक जना बंगलादेशी नागरिक गरी २४ जना सवार थिए ।

शनिबार राति जहाजसँग सम्पर्क विच्छेद भएपछि म्यारिटाइम रेस्क्यु कोअर्डिनेसन सेन्टर (एमआरसीसी) ले खोजी तथा उद्धार अभियान सुरु गरेको हो ।

जहाज सञ्चालन गर्ने कम्पनी भिक्ट्री स्टार ग्रुप कम्पनी लिमिटेडले उद्धारका लागि सहयोग मागेपछि भारतीय अधिकारीहरूले अभियान अघि बढाएका छन् ।

दुई जनाको उद्धार

सूचना प्राप्त भएपछि एमआरसीसीले अन्तर्राष्ट्रिय सुरक्षा सञ्जाल सक्रिय गर्दै एमटी आइसोपोस नामको अर्को जहाजलाई घटनास्थलतर्फ पठाएको थियो ।

उद्धार टोलीले दुईवटा लाइफराफ्टबाट दुई जना चालक दलका सदस्यलाई जीवितै उद्धार गरेको छ । उद्धार गरिएका दुवै जनाको पहिचान भने तत्काल सार्वजनिक गरिएको छैन ।

बाँकी चालक दलका सदस्यको खोजीका लागि भारतीय तटरक्षक बलले अभियानलाई तीव्र बनाएको छ ।

सिंगापुर गइरहेको थियो जहाज

प्रारम्भिक विवरणअनुसार फलाम उत्पादनमा प्रयोग हुने कच्चापदार्थ बोकेको एमभी ओसन विनर ओडिशाको पारादीप बन्दरगाहबाट सिंगापुर जाँदै थियो तर जहाज ट्र्याकिङ प्रणालीबाट हराएको थियो ।

जहाज पारादीप तटबाट २०० समुद्री माइलभन्दा बढी टाढा रहेको बताइएको छ ।

अधिकारीहरूका अनुसार जहाजको अन्तिम रिपोर्ट गरिएको स्थान इस्ट आइल्यान्ड लाइटबाट करिब ३१० समुद्री माइल टाढा थियो ।

जहाज किन डुब्यो भन्नेबारे भने अहिलेसम्म स्पष्ट जानकारी आएको छैन ।