कांग्रेस प्रवक्ताको प्रश्न : नेता अब अदालतले तोक्नु पर्ने ?

९ भदौ, काठमाडौं । नेपाली कांग्रेसका प्रवक्ता देवराज चालिसेले पार्टीभित्र देखिएको असन्तुष्टिको समाधान अदालतमार्फत नभई विधान र लोकतान्त्रिक प्रक्रियाबाट खोजिनुपर्ने बताएका छन् ।

महाधिवेशन रोक्न अदालतमा निवेदन दिने तथा पार्टीभित्रका विवादलाई न्यायिक प्रक्रियामा लैजाने प्रवृत्तिप्रति असन्तुष्टि जनाउँदै उनले कांग्रेसको नेतृत्व र नेतृत्व चयनको अधिकार पार्टीका कार्यकर्तामा रहेको बताएका हुन् ।

‘कांग्रेसको नेता को हो ? अब अदालतले तोक्नु पर्ने ? अधिवेशन रोक्ने निवेदन ?,’ संस्थापन इतर समूहले महाधिवेशन रोक्न माग गर्दै सर्वोच्च अदालतमा निवेदन दिएपछि प्रवक्ता चालिसेले सामाजिक सञ्जाल फेसबुकमा लेखेका छन् ।

उनले दलको नेता चयन दलको अधिवेशनले गर्ने भन्दै विशेष वा नियमित जुनसुकै अधिवेशन भए पनि लोकतान्त्रिक विधिबाट नेतृत्व चयन हुनुपर्नेमा जोड दिएका छन् । ‘दलभित्र विश्वास गुमाउने अनि त्यसपछि अदालत ? यो शैलीले दललाई न्याय गर्दैन,’ चालिसेको भनेका छन् ।

कांग्रेसभित्र देखिएको पछिल्लो असन्तुष्टि नितान्त व्यक्तिगत विषयमा केन्द्रित रहेको प्रवक्ता चालिसेको दाबी छ । पार्टीको राजनीतिक विचार र कार्यक्रमसँग सम्बन्धित फरक मत स्वाभाविक हुने भन्दै उनले लोकतान्त्रिक पार्टीले त्यस्ता फरक विचारलाई ग्रहण गर्न सक्नुपर्ने बताएका छन् ।

‘पार्टीभित्र नेताहरूको निजी राजनीतिक भविष्य र पार्टीको भविष्य फरक विषय हुन् । पार्टीका शुभचिन्तकहरूले व्यक्ति होइन, पार्टीलाई मद्दत गरिरहेका हुन्छन्,’ उनले लेखेका छन्, ‘पार्टीप्रति जनताले राखेको भरोसा र विश्वासलाई नेताले थप मजबुत बनाउने हो । त्यसलाई कमजोर बनाउने, सार्वजनिक विश्वासघात गर्ने कार्य अक्षम्य हुन्छ ।’

कानूनी विवादको फैसला अदालतले गर्ने भए पनि पार्टीका लाखौँ कार्यकर्ताको मतबाट हुने फैसला अझ शक्तिशाली हुने चालिसेको तर्क छ । ‘कानूनी विवादको फैसला अदालतको इजलासले गर्ला, त्यो आफ्नो ठाउँमा छ,’ उनले लेखेका छन्, ‘तर लाखौँ कार्यकर्ताको मतको इजलासले गर्ने फैसला अदालतभन्दा शक्तिशाली हुन्छ ।’