रसुवा बाढी : उपचारमा जुट्न चाहने चिकित्सकले अस्थायी दर्ता लिन पाउने

१६ भदौ, काठमाडौं । नेपाल मेडिकल काउन्सिलमा दर्ता नभएका चिकित्सकले पनि अस्थायी दर्ता लिएर बाढीपीडितको उपचारमा संलग्न हुन पाउने भएका छन ।नेपाल मेडिकल काउन्सिलले सोमबार एक सूचना जारी गर्दै यसबारे जानकारी दिएको हो ।

प्राकृतिक विपद्‍मा परेका घाइतेको उपचार गर्न चाहने स्वदेशी तथा विदेशी चिकित्सक, स्वास्थ्य स्वयंसेवी तथा संघसंस्थाले काउन्सिलबाट अस्थायी दर्ता लिन सक्ने काउन्सिलले जनाएको छ ।

‘नेपाल मेडिकल काउन्सिलमा दर्ता नभएका चिकित्सक तथा संघसंस्थाले नेपालको प्रचलित ऐन, कानुन र नियमअनुसार व्यक्तिगत वा सामूहिक रूपमा उपचार सेवामा संलग्न हुनुअघि काउन्सिलबाट स्वीकृति वा अस्थायी दर्ता लिन सकिनेछ’ सूचनामा भनिएको छ ।

यस्तै, उपचारमा संलग्न हुने चिकित्सक तथा संघसंस्थाले स्वास्थ्य मन्त्रालयको विपद् व्यवस्थापन महाशाखासँग समन्वय र संयोजन गर्नुपर्ने काउन्सिलले जनाएको छ ।

साथै, उपचारमा संलग्न जनशक्ति, प्रयोग भएका स्रोत–साधन र उपचार सामग्रीको विवरणसँगै उपचार सेवा प्राप्त गरेका व्यक्तिको यथार्थ विवरण स्वास्थ्य मन्त्रालयको विपद् व्यवस्थापन महाशाखा र काउन्सिलमा पेस गर्न पनि अनुरोध गरिएको छ ।