रसुवा बाढी : यसरी आइरहेको छ विदेशबाट सहयोग सामग्री (तस्वीरहरू)

१७ भदौ, काठमाडौं । नेपाल–चीन सीमा क्षेत्रमा भदौ १० मा आएको विनाशकारी बाढी तथा पहिरोपछि प्रभावित नागरिकको उद्धार, राहत तथा पुनःस्थापनाका लागि अन्तर्राष्ट्रिय समुदायले नेपाललाई मानवीय सहायता उपलब्ध गराउन गराइरहेका छन् । भारत, अमेरिका, चीन, जापान, बेलायत, अष्ट्रेलिया युएइ, कतार लगायतका मुलुकहरुले मानवीय सहयोग पठारहेका छन् । आफ्ना विमानबाटै उनीहरूले सामग्रीहरू पठाइरहेका छन् ।

संयुक्त राज्य अमेरिकाले आजै नेपाललाई थप मानवीय तथा विपद् प्रतिकार्य सहायता उपलब्ध गराएको छ। अमेरिकाका दुईवटा सैन्य मालवाहक विमानले ५,००० वटा विशेष विपद् पीडित उद्धार तथा व्यवस्थापन सामग्री, ५०० वटा प्राथमिक उपचार किट, स्ट्रेचर तथा अगाडि माटो तथा ढुंगा हटाउने लोडरहरू नेपाल ल्याएका थिए ।

भारतले पाँचौपटकसम्मको मानवीय सहायता सामग्री पठाइसकेको छ ।

चीनले प्रधानमन्त्री दैवी प्रकोप उद्धार कोषमा ३० करोड रुपैयाँ सहयोग गरिसकेको छ। चीनबाट आएको उद्धार टोलीले प्रभावित क्षेत्रमा काम गरिरहेको छ।

चीनले ५० टन राहत सामग्री उपलब्ध गराएको छ। साथै, नेपाल सरकारले चीनसँग प्रभावित क्षेत्रका लागि ३० वटा बेलीब्रिज सहयोग गर्न अनुरोध गरेको छ।

चीनको जनमुक्ति सेनाको वायुसेनाका मालवाहक विमान सामान लिएर आएका थिए । चीनले पाल, कम्बल, सुत्ने झोला, हार्ड ट्याक तथा प्राथमिक उपचार किटलगायत सामग्रीको पठाएको छ ।

चीनले राहत सामग्रीसँगै सुरुङ उद्धार विशेषज्ञ तथा आवश्यक उद्धार उपकरणसमेत नेपाल पठाएको छ।

जापानबाट पाल, कम्बलदेखि पानी राख्ने कन्टेनरसम्ममा सामग्री आएका छन् ।

बेलायतले पनि नेपाललाई मानवीय सहायता उपलब्ध गराउने अभियानमा साथ दिएको छ। बेलायतकी इन्डो–प्यासिफिक मामिलासम्बन्धी मन्त्री बारोनेस विन्टरटन काठमाडौं आएर त्रिभुवन अन्तर्राष्ट्रिय विमानस्थलमा रहेको मानवीय सहायता स्टेजिङ क्षेत्रको निरीक्षण गरेकी छन्।

यूके एडको सहयोगमा सञ्चालनमा ल्याइएको उक्त केन्द्र राहत सामग्री भण्डारण तथा प्रभावित क्षेत्रमा वितरण गर्ने केन्द्रका रूपमा प्रयोग भइरहेको छ।

अष्ट्रेलियाले पनि बाढीबाट प्रभावित नेपालका समुदाय तथा प्रभावित अष्ट्रेलियाली नागरिक र उनीहरूका परिवारलाई सहयोग पठाएको छ ।

यूएईले ८३ टन अत्यावश्यक राहत सामग्री उपलब्ध गराइसकेको छ भने १० मिलियन डलरसम्मको सहयोगको प्रतिबद्धता जनाएको छ।

कतारले पनि राहत सामग्री उपलब्ध गराएको छ। पाकिस्तानबाट ८६ टन राहत सामग्री प्राप्त हुँदैछ। श्रीलंकाले १० लाख अमेरिकी डलर बराबरको सहयोगको प्रतिबद्धता जनाएको छ।

स्विट्जरल्यान्डबाट १ मिलियन स्विस फ्र्याङ्क (संयुक्त राष्ट्र संघबाट खर्च हुने गरी) प्राप्त भएको छ।

एसियाली विकास बैंक (एडीबी)बाट बजेटरी सहयोग (अनुदान) का लागि ५ मिलियन अमेरिकी डलर, विश्व बैंकबाट १६७ मिलियन अमेरिकी डलरको सहुलियतपूर्ण कर्जा, एसियाली विकास बैंकबाट प्राविधिक सहायताका लागि १ लाख ५० हजार अमेरिकी डलर उपलब्ध गराउने प्रतिबद्धता आएको छ ।

युके, जापानलगायत मित्रराष्ट्रबाट पनि सहयोगको प्रतिबद्धता आएको छ भने इयू र सयुक्त राष्ट्रसंघका निकायहरुबाट पनि सहयोग प्राप्त भइरहेको छ।

तस्वीर सौजन्य : सम्बन्धित देशका राजदूतावास