तिनाउ नदीमा पौने दुई अर्बको ‘सिग्नेचर ब्रिज’ निर्माण हुँदै, चिनियाँ कम्पनीलाई ठेक्का

१९ भदौ, बुटवल । बुटवलको तिनाउ नदीमाथि आधुनिक ‘सिग्नेचर ब्रिज’ निर्माणको ठेक्का सम्झौताको प्रक्रिया अघि बढेको छ । सडक विभागअन्तर्गत विकास सहयोग कार्यान्वयन महाशाखाले निकालेको ठेक्का  चिनियाँ कम्पनी एम/एस आनहुई सिजियान होल्डिङ ग्रुपले प्राप्त गरेको छ ।

विभागले ३ सेप्टेम्बर २०२६ मा जारी गरेको ठेक्का सूचनाअनुसार उक्त चिनियाँ कम्पनीले भ्याट तथा पीएससहित एक अर्ब ७० करोड ५२ लाख ९५ हजार ५९२ रुपैयाँ ५७ पैसामा ठेक्का पाएको छ ।

निर्माण अवधि तीन वर्ष र त्यसपछि पाँच वर्षको ‘डिफेक्ट नोटिफिकेसन पिरियड’ गरी परियोजनाको कुल अवधि आठ वर्ष तोकिएको प्रोजेक्ट डाइरेक्टर अर्जुनप्रसाद अर्यालले जानकारी दिए ।

बुटवल–गोरुसिङ्गे सडकखण्डअन्तर्गत तिनाउ नदीमा नयाँ पुल र पहुँच सडक निर्माण गर्ने उद्देश्यले यो पुल निर्माण हुँदैछ ।

विभागको सूचनाअनुसार पुलको लम्बाइ करिब २४० मिटर हुनेछ । दुवैतर्फको पहुँच सडकको लम्बाइ न्यूनतम ९८० मिटर रहने भनिएको छ ।

संरचना दुईतर्फी अर्थात् ट्विन क्यारिज–वे अवधारणामा निर्माण हुनेछ । प्रोजेक्ट डाइरेक्टर अर्यालले चिनियाँ कम्पनीलाई ठेक्का सम्झौताका लागि सूचना निकालेर आह्वान गरिसकिएको र सम्झौता भएपछि काम अघि बढ्ने बताए ।

महत्वपूर्ण योजना

तिनाउको सिग्नेचर ब्रिज बुटवलको दीर्घकालीन पूर्वाधार योजनामध्ये महत्वपूर्ण आयोजना मानिएको छ ।

नेपाल सरकारको आर्थिक वर्ष २०८०/८१ को बजेटमार्फत नारायणी र तिनाउ नदीमा सिग्नेचर ब्रिज निर्माण सुरु गर्ने घोषणा गरिएको थियो ।  त्यो बेला सरकारले विश्व बैंकको सहुलियतपूर्ण ऋण सहयोगमा नारायणी र तिनाउसहित विभिन्न स्थानमा यस्ता पुल निर्माण गर्ने कार्यक्रम अघि बढाएको थियो ।

तिनाउ नदीमा निर्माण हुने यो पुल आसपास रहेको ऐतिहासिक जितगढी किल्लालाई समेत पर्यटनसँग जोड्ने उद्देश्यसहित परिकल्पना गरिएको छ ।

प्रोजेक्ट डाइरेक्टर अर्यालका अनुसार सिग्नेचर ब्रिज सामान्य पुलभन्दा फरक हुन्छ । सहर वा कुनै क्षेत्रको पहिचान बन्ने गरी विशेष वास्तुकला, आकर्षक डिजाइन र आधुनिक इन्जिनियरिङ प्रयोग गरेर निर्माण गरिएको ‘आइकोनिक’ पुललाई सिग्नेचर ब्रिज भनिन्छ ।

यस्ता पुलको उद्देश्य नदी वारपार गर्ने सुविधासँगै सहरको ल्यान्डमार्क, पर्यटकीय आकर्षण र आधुनिक पूर्वाधारको प्रतीक बन्ने गरी डिजाइन गरिन्छ ।

‘आकर्षक र आधुनिक डिजाइनले बुटवलको पर्यटन सम्भावनालाई एउटै संरचनामा जोड्ने सिग्नेचर ब्रिजको  विशेषता हो’, अर्यालले भने, ‘पुरानो पुलको विकल्प मात्रै होइन,यसले बुटवलको परिचय र पहिचान नै बदल्नसक्छ ।’