पश्चिम एसियाका दूतावासहरूमा अमेरिकाको सुरक्षा ‘अलर्ट’, बिदा नसकिँदै ह्वाइट हाउस फर्किए ट्रम्प

४ भदौ, काठमाडौं । अमेरिकाले पश्चिम एसियामा रहेका आफ्ना दूतावास र नागरिकहरूका लागि सुरक्षा अलर्ट जारी गरेको छ। अमेरिकी विदेश मन्त्रालयले यस क्षेत्रमा बढ्दो तनावबीच मानिसहरूलाई थप सतर्क रहन आग्रह गरेको छ।

अमेरिकाले इराक, बहराइन, ओमान, साउदी अरब, इरान, कतार, लेबनान, कुवेत र जोर्डनमा बसोबास गरिरहेका आफ्ना नागरिकहरूलाई सावधान रहन भनेको छ। पश्चिम एसियामा जारी द्वन्द्व तीव्र रूपमा बढ्न सक्ने अमेरिकाले जनाएको छ।

त्यसैले यी देशहरूको भ्रमण गर्ने अमेरिकीहरूलाई पनि सावधानी अपनाउन सल्लाह दिइएको छ। अमेरिकी नागरिकहरूलाई उडान र विमानस्थलसँग जोडिएका ताजा जानकारीहरू अद्यावधिक गरिरहन भनिएको छ।

उता, अमेरिकी राष्ट्रपति डोनाल्ड ट्रम्प आफ्नो क्याम्प डेभिड भ्रमण एक दिनअगावै छोट्याएर शनिबार साँझ ह्वाइट हाउस फर्किएका छन्। ट्रम्प बिदा नसकिँदै चाँडै फर्किनुको कारण भने ह्वाइट हाउसले खुलाएको छैन।

रसिया टुडेको रिपोर्टअनुसार, अमेरिकी बी-१बी लान्सर बम्बर बेलायतको आरएएफ फेयरफोर्ड एयरबेसबाट ‘फुल आफ्टरबर्नर’का साथ उडान भर्दै पश्चिम एसियातर्फ प्रस्थान गरेको छ। यसको भिडियोसमेत सार्वजनिक भएको छ।

इरानको प्रेस टिभीले पनि उत्तर-पूर्वी सिरियाको अल-हसाकाहस्थित खाराब अल-जिर एयरबेसनजिकै हवाई प्रतिरक्षा गतिविधि भएको जानकारी दिएको छ।

इरानद्वारा युद्ध अन्त्य गर्न ७ सर्त अघि

इरानले चलिरहेको युद्ध अन्त्य गर्न अमेरिकाका सामु ७ वटा सर्त राखेको छ। इरानले भनेको छ- यदि अमेरिकाले उसका मागहरू मानेन भने ऊ युद्ध जारी राख्न तयार छ।

इरानका सुरक्षा प्रमुख मोहसिन रेजाईले अल जजिरालाई बताएअनुसार, कतारले मध्यस्थकर्ताको रूपमा इरानका सर्तहरू अमेरिकासम्म पुर्‍याइसकेको छ। अब इरान ट्रम्पको जवाफको पर्खाइमा छ।

रेजाईका अनुसार, इरानका मागहरूमा सबै मोर्चाहरूमा युद्ध रोक्नुपर्ने, विदेशमा रोक्का गरिएका इरानी कोषहरू फुकुवा गर्नुपर्ने र नौसैनिक नाकाबन्दी अन्त्य गर्नुपर्ने लगायतका कुरा समावेश छन्।

एजेन्सीहरूको सहयोगमा