ओलीको गुनासो- समृद्ध नेपाल, सुखी नेपालीको लक्ष्यमा धक्का लाग्यो

२९ असोज, काठमाडौं । नेकपा एमालेका अध्यक्ष  केपी शर्मा ओलीले ‘समृद्ध नेपाल, सुखी नेपाली’को राष्ट्रिय लक्ष्य प्राप्त गर्ने यात्रामा पछिल्लो समय धक्का लागेको बताएका छन् ।

बिहीबार पार्टी केन्द्रीय कार्यालय च्यासलमा एमालेको नीति अध्ययन तथा अनुसन्धान प्रतिष्ठानको वेबसाइट सार्वजनिक गर्दै उनले पछिल्ला राजनीतिक तथा अन्य घटनाक्रमले विकासको गन्तव्य केही दशक पछाडि धकेलेको बताए । तर, यसलाई असफलता वा पराजयका रूपमा लिन नहुने उनको भनाइ थियो ।

‘हामीले समृद्ध नेपाल, सुखी नेपालीको लक्ष्य लिएका छौँ । पछिल्ला घटनाका कारण हाम्रो गन्तव्य केही पछाडि धकेलिएको छ, तर यसको अर्थ हामी असफल वा पराजित भएका होइनौँ,’ ओलीले भने ।

उनले आफ्नो कार्यकालमा अघि बढाइएका सामाजिक सुधारका कार्यक्रमलाई समाजवादउन्मुख राज्य निर्माणका प्रयासका रूपमा व्याख्या गरे । सडक बालबालिकाको उद्धार तथा व्यवस्थापन, सहयोगापेक्षी सडक मानवको संरक्षण र सडकमा भिक्षा माग्नुपर्ने अवस्थाको अन्त्य गर्ने प्रयासलाई उनले जिम्मेवार सरकारको अवधारणासँग जोडे ।

ओलीले ज्येष्ठ नागरिक भत्ता, स्वास्थ्य बीमा, सामाजिक सुरक्षा कार्यक्रम र बालबालिकाका लागि सञ्चालित ‘खोलौँ खाता’ अभियानलाई पनि मानवतावादी सोचका उदाहरणका रूपमा प्रस्तुत गरे ।

‘हामीले समाजवादको आधार निर्माण गर्ने क्रममा सामाजिक क्षेत्रमा विभिन्न काम गरेका थियौँ । सडक बालबालिकालाई उद्धार गरी उचित व्यवस्थापन गर्ने, असहाय र बेसहारा सडक मानवको संरक्षण गर्ने तथा सडकमा भिक्षा माग्नुपर्ने अवस्थाको अन्त्य गर्ने प्रयास गर्‍यौँ,’ उनले भने ।

सरकारको जिम्मेवारी हिसाबकिताब र जवाफदेहितामा मात्र सीमित नहुने उल्लेख गर्दै ओलीले नागरिकप्रति सरकार संवेदनशील हुनुपर्ने बताए ।

‘जसरी आमाले आफ्ना सन्तानको हेरचाह माया र आत्मीयताका साथ गर्छिन्, त्यसरी नै सरकारले पनि आफ्ना नागरिकप्रति जिम्मेवार भएर काम गर्नुपर्छ,’ उनले भने ।

आफ्नो कार्यकालमा भएका विकास निर्माण तथा सामाजिक कामको आलोचनाबारे टिप्पणी गर्दै ओलीले नागढुंगा क्षेत्रमा राखिएको साइनबोर्डको विवादलाई सामान्य प्राविधिक विषयका रूपमा व्याख्या गरे । यस्ता विवादले सरकारले गरेका सामाजिक कामको महत्त्व र तिनको इतिहास मेटाउन नसक्ने उनको भनाइ थियो ।

‘हामीले गरेका सामाजिक कार्यहरूको महत्त्व कुनै साइनबोर्ड हटाउँदैमा समाप्त हुँदैन । ती कामले समाजमा पारेको प्रभाव र तिनको इतिहासलाई मेटाउन सकिँदैन,’ ओलीले भने ।

उनले ‘सुखी नेपाली’ बनाउने लक्ष्य हासिल गर्न पहिले नागरिकका दुःख, गरिबी र अभाव हटाउनुपर्नेमा जोड दिए । नागरिकका आधारभूत आवश्यकता पूरा गर्ने वातावरण निर्माण गर्नु नै समृद्धिको यात्राको सुरुआती सर्त भएको उनको भनाइ थियो ।

‘सुखी नेपाली बनाउने हो भने पहिले जनताका दुःख निवारण गर्नुपर्छ । गरिबी, अभाव र असहाय अवस्थाको अन्त्य गर्दै नागरिकका आधारभूत आवश्यकता पूरा गर्ने वातावरण बनाउनुपर्छ,’ उनले भने, ‘पहिले दुःख निवारण, त्यसपछि सुख प्राप्ति, यही सोचका साथ हामीले सामाजिक न्याय र समृद्धिको बाटो अघि बढाएका थियौँ ।’