२९ असोज, काठमाडौं । पोखरा प्रिमियर लिग (पीपीएल) क्रिकेट प्रतियोगिताको खेल तालिका सार्वजनिक भएको छ ।
आयोजक क्विन्स इभेन्ट्स म्यानेजमेन्टले खेल तालिका सार्वजनिक गरेको हो, जसअनुसार कर्तिक ९ गते हुने उद्घाटन खेलमा विराटनगर टाइटन्सले पोखरा पल्टनसँग प्रतिस्पर्धा गर्ने छ ।
प्रतियोगिताको पहिलो दिन एक खेल मात्रै हुनेछ । दोस्रो दिन अक्टोबर २७ तारिखमा दुई खेल आयोजना हुने छ । पहिलो खेलमा चितवन राइनोजले बुटवल ब्लास्टरसँग प्रतिस्पर्धा गर्ने छ भने यही दिनको दोस्रो खेलमा काठमाडौं रोयल्सले एक्स्पर्ट धनगढी ब्लुजको सामना गर्नेछ ।
पोखरामा आगामी कात्तिक ९ देखि २० गतेसम्म पोखरा प्रिमियर लिग (पीपीएल) टी-२० क्रिकेट प्रतियोगिता सुरु हुँदैछ । ६ टिमको सहभागिता हुने पीपीएल पोखरा रंगशालास्थित क्रिकेट मैदानमा हुनेछ ।
प्रतियोगितामा विराटनगर टाइटन्स, चितवन राइनोज, पोखरा पल्टन, बुटवल ब्लास्टर, काठमाडौं रोयल्स र एक्स्पर्ट धनगढी ब्लुज गरी ६ टिम रहेका छन् ।
