२० फागुन, काठमाडौं । राष्ट्रिय गौरवको तामाकोशी जलविद्युत आयोजनाको शेयर विक्री भइरहेका बेला रामेछापबासीले पनि शेयर पाउनुपर्ने माग गर्दै बुधबार सर्वोच्च अदालतमा रिट दर्ता भएको छ ।
तामाकोशी प्रभावित क्षेत्र दोलखाभन्दा रामेछाप बढी भएको भन्दै अधिवक्ता थरिप्रसाद कँडेलसहित १२ जनाले दोलखालीले जत्तिकै शेयर पाउनुपर्ने माग गर्दै रिट दायर गरेका हुन् । ‘प्रभावित क्षेत्रका बासिन्दाले पाउने शेयरको हक रामेछापबासीको पनि छ भनेर रीट दायर गरेका हौं’ अधिवक्ता कँडेलले भने ‘समानताको सिद्धान्त बमोजिम रामेछापबासीले पनि दोलखाबासीको जत्तिकै शेयर पाउनुपर्छ ।’
रिटमा रामेछापका ११ गाविस तामाकोशीबाट प्रभावित भन्दै सदरमुकाम मन्थली र विमानस्थलसमेत तामाकोशी किनारामा रहेकाले प्रभावितको परिभाषामा रामेछापबासीलाई पनि पार्नुपर्ने माग गरिएको छ ।
दोलखाबासी सबैले शेयर पाउँदा रामेछापबासीले पनि पाउनुपर्ने दावी सहित रिट दायर भएको हो । १२ लाख घनमिटर जलाशयुक्त आयोजना फुटेमा सबैभन्दा ठूलो क्षति रामेछापबासीले ब्यहोर्ने दावी गरिएको छ ।
आयोजनाको मुख्य निर्माणस्थल दोलखाको लामाबगर गाविसमा भए पनि यसको मुख्य प्रसारण केन्द्र भने रामेछापको फुलासी १ देवीटारमा निर्माण भइरहेको छ । ‘तामाकोशी वारिका देवीटारका जनताले रामेछापबासी भए बापत शेयर नपाउने, तर पारि किर्नेटारका बासिन्दाले दोलखाबासी भए बापत पाउने भन्ने कुरा न्याय हुन्न’ रिटमा भनिएको छ ।
सर्वोच्च अदालतले रिटमाथिको पेशी फागुन २२ गते शुक्रबारका लागि तोकेको छ । रिट निवेदकको तर्फबाट गोविन्द बन्दी, रामप्रसाद भण्डारी लगायतले बहस गर्नेछन् ।
शेयरका कारण मुद्दै मुद्दा
४५६ मेगावाट क्षमताको तामाकोशी आयोजना नबन्दै यसको शेयर विवाद अदालतमा पटक-पटक पुगिरहेको छ । आयोजनास्थल लामाबगर र गौरीशंकर गाविसलाई मात्र बढी प्रभावित भनेर त्यहाँका बासिन्दालाई ३०० कित्ता शेयर छुट्याएकोमा दोलखाकै अन्य ११ गाविसको तर्फबाट अदालतमा रिट दायर भएको छ ।
त्यस्तै कर्मचारी सञ्चयकोषका कर्मचारीले धेरै शेयर पाउने र सञ्चयकोषमा रकम दाखिला गर्ने अन्य सरकारी कर्मचारीले कम पाउने प्रावधानमा समेत असहमति जनाउँदै दायर भएको मुद्दा विचाराधीन छ ।
