श्रीधर पौडेल
१३ जेठ, काठमाडौं । काभ्रे बनेपाका राजविक्रम केसी छोरी लिएर भक्तपुरको पलाँसेस्थित ‘काठमाडौं फन भ्याली’ आइपुगे । केही क्षण रमाइलो गरेर भूकम्पको त्रासलाई भुल्न फन भ्याली आएको उनले बताए ।
त्यस्तै कलंकीका सुमन चित्रकार पनि ४ जनाको परिवारसहित फन भ्यालीमै भेटिए । उनी पनि मानसिक तनावबाट मुक्त हुने ठाउँ खोज्दा खोज्दै फन भ्यालीलाई नै उपयुक्त ठाउँ ठानेर पलाँसे आइपुगे । ‘भूकम्पले साह्रै अत्यायो, यसो मुड फ्रेस गर्न आएको,’ चित्रकारले भने ।
सुमन र राजविक्रमजस्तै स्कूल विदाको मौका पारेर छोरा-छोरीलाई घुमाउने, आफू पनि घुम्ने र भूकम्पको मानसिक पीडा भुल्दै रमाइलो गर्नेहरुको संख्या आजभोलि बढेको छ ।
भूकम्पमा घरहरु भत्किएको, घरमा च्यापिएर मानिसहरुको मृत्यु भएको तथा घाइते भएको दृश्य देखेकाहरुलाई बेलाबेला आइरहने पराकम्पनले झन् धेरै मानसिक पीडा दिएको छ । यही पीडा भुल्ने प्रयासमा छन् धेरै मानिसहरु । कोही सांगीतिक कार्यक्रममा सहभागी हुन्छन् भने कोही योग र ध्यानमा ।
यसका लागि विभिन्न सामाजिक संघसंस्थाहरुले भूकम्प प्रभावित क्षेत्रमा अभियान नै चलाएका छन् यतिबेला ।
काठमाडौं फन भ्यालीमा आएकाहरु अधिकांश भूकम्पको पीडालाई बिर्सने र मानसिक तनावबाट मुक्त हुन चाहनेहरु छन् । उनीहरुलाई लक्षित गरी काठमाडौं फन भ्यालीले बालबालिकाहरुलाई निःशुल्क सेवा दिइरहेको छ ।
अभिभावकलाई ५० प्रतिशत छुट दिइएको छ । यसअघि ६ सय रुपैयाँ तिर्नुपर्नेमा ३ सय मात्रै लिने गरिएका फनपार्कका सञ्चालक दिनेश गिरीले अनलाइनखबरलाई बताए । वालवालिकालाई लिइने गरेको ४ सय रुपैयाँ अहिले पूर्ण मिनाहा गरिएको छ ।
गिरीका अनुसार अचेल दैनिक १५ देखि १६ सयसम्म बालबालिकाहरु रमाइलो गर्न आउने गरेका छन् । ‘भूकम्पका बेला सबै पीडामा छन्, त्यही भएर हामीले बालबालिकाहरुलाई निःशुल्क प्रवेशको व्यवस्था मिलाएका छौं,’ गिरीले भने ।
काठमाडौं फन भ्यालीमा स्वीमिङ, रेष्टुरेन्ट लगायतको सुविधा छ ।
फन भ्यालीमा रमाउँदै बालबालिका र तिनका अभिभावकहरू