कविन अधिकारी
१५ असार, काठमाडौं । अखिल नेपाल किसान संघका अध्यक्षसमेत रहेका उपप्रधानमन्त्री तथा गृहमन्त्री बामदेव गौतमले मंगलबार बिहान साढे १० बजे धर्मस्थलीमा धान रोप्ने कार्यक्रम थियो ।
निर्धारित समयभन्दा झण्डै डेढघन्टा ढिलो मन्त्री गौतम तामझामका साथ सुरक्षा दस्तापछि लाएर रोपाइँस्थलमा पुगेका थिए । मन्त्री धान रोप्न आउने भनेपछि रोपाहारहरुले मेलामा दुईघण्टासम्म पर्खिए । गृहमन्त्रीले धान रोपेको फोटो र भिडियो खिच्न पहिल्यै दर्जनौं संख्यामा सञ्चारकर्मीहरु तम्तयार थिए ।
आयोजक अखिल नेपाल किसान संघका कार्यालय सचिव डीबी कार्कीले पठाएको निम्तोमा गृहमन्त्रीले ‘सांकेतिक रुपमा धान रोप्ने’ उल्लेख थियो ।
तर, अघिल्लो वर्ष हिलोमै लडिबुडी गरेर रोपाई उत्सव मनाएका मन्त्री गौतम यसपालि भने हिलोमै पसेनन् । उनले डिलमै उभिएर असारे किसानहरुलाई भाषण सुनाए ।
सोही कार्यक्रममा पुगेकी उर्जामन्त्री राधा ज्ञवालीले भने केहीबेर हिलोमा पसेर सांकेतिक रुपमा धान रोपिन् ।
मन्त्री गौतम भने आयोजक नेपाल किसान संघका कार्यकर्ताको हातबाट दुबोको माला पहिरिएर केहीबेर भाषण गरे । अनि दलबलका साथ सिंहदरबार फर्किए ।
भाषणमा उनले भने, ‘निकट भविष्यमै हाम्रो पार्टीको नेतृत्वमा गठन हुने सरकारले किसानको पेशागत हितका लागि ठोस पहल गर्नेछ ।’