१८ साउन, काठमाडौं । म्यानचेष्टर युनाइटेडका विंगर एन्जल डि मारिया पेरिस सेन्ट जर्मेन जाने भएका छन् ।
२४ घन्टाभित्र उनको मेडिकल हुनेछ । २७ वर्षे अर्जेन्टिनी ४४.५ मिलियनमा फ्रान्स च्याम्पियन पेरिस सेन्ट जर्मेन गएको बताइएको छ । उनले चार वर्षे सम्झौतामा सहमति जनाएका छन् ।
अर्जेन्टिनाबाट कोपा अमेरिका खेलेका डि मारिया युनाइटेडको प्रि सिजन टुरमा समेत सहभागी भएका थिएनन् ।
उनी बेलायतको कीर्तिमानी ५९.७ मिलियनमा गत सिजन मात्र रियल मड्रिडबाट वर्ल्ड ट्राफड आएका थिए । सुरुवात चार खेलमा एक गोल र तीन गोलका लागि पास मिलाएका उनले त्यसपछि आफ्नो लय गुमाए ।
त्यसपछि उनले मात्र एक खेलमा पहिलो मिनेटबाटै खेल्ने मौका पाएका थिए ।
