१२ माघ, काठमाडौं । प्रहरी महानिरीक्षकको दौडमा रहेका डीआइजीहरु आफ्नो ड्युटी नै छाडेर राजनीतिक लबिङमा जुट्न थालेका छन् । ‘ठूला बिचौलिया’ हरु मार्फत भावी आइजीपीका दाबेदारहरु प्रभावशाली नेताका निवास एवं होटलहरुमा भेटिन थालेका छन् ।
आइजीपी दाबेदारको तेस्रो बरियतामा रहेका डीआइजी जयबहादुर चन्द मंगलबार कार्यालय समयमा नयाँ बानेश्वरको इन्द्रेणी फुडल्याण्डमा केही विचौलियाका साथ छलफल गरिरहेको अवस्थामा भेटिए ।
डीआइजी चन्दले नेपाली कांग्रेसका सुदूर र मध्यपश्चिमका केही जिल्ला सभापतिहरुलाई काठमाडौंमै बोलाएर आफूलाई आइजी बनाउने लबिङमा खटाएको कांग्रेसका एक नेताले बताए । केही जिल्ला सभापतिहरु यसैका लागि सुदूरपश्चिबाट काठमाडौं आउँदैछन् ।
मंगलबार इन्द्रेणी फुडल्याण्डमा डीआइजी चन्द यही विषयमा छलफल गरिरहेका थिए । उनी त्यहाँ कांग्रेसका केही जिल्ला सभापतिसँग छलफलमा थिए ।
बैतडी जिल्लामा जन्मेका डीआइजी चन्दले सुदूरपश्चिमका प्रायः सबै कांग्रेस जिल्ला सभापति र सांसदहरुलाई आफ्नो पक्षमा लबिङका लागि आग्रह गरेका छन् । उनले मध्यपश्चिमका पनि केही प्रभावशाली कांग्रेस नेताहरुलाई लबिङमा उतारेको एक कांग्रेस सांसदले अनलाइनखबरलाई बताए ।
डीआइजी चन्द आफैंले कांग्रेसका जिल्ला सभापति र सो क्षेत्रका प्रभावशाली नेताहरुलाई कुरा गरेर सुदूरपश्चिमले आइजीपी पाउने अवसर नगुमाउन आग्रह गरिरहेको स्रोतले बतायो । उनले सबै जिल्ला सभापतिहरु मार्फत कांग्रेस सभापति शेरवहादुर देउवा र गृहमन्त्री बिमलेन्द्र निधीलाई दबाब दिलाउने योजना बनाएको स्रोतले बतायो ।
प्रत्यक्ष निर्वाचित सांसदसमेत रहेका सदुरपश्चिमको एक पहाडी जिल्लाका कांग्रेस सभापतिले डीआइजी चन्दलाई भने- हामीले व्यक्तिगतरुपमा पहल गरिरहेकै छौं, सामुहिक रुपमा जिल्ला सभापतिहरु काठमाडौं आएर शेरबहादुर दाइलाई र बिमल दाइ (बिमलेन्द्र)लाई दबाव दिँदैछौं ।
डीआइजी चन्दले सुदूरपश्चिमका एमाले कमाण्डर भीम रावलमार्फत एमाले नेतृत्वलाई पनि सकारात्मक बनाउन चाहेका छन् । तर, आइजीपी नियुक्तिमा प्रमुख विपक्षी एमालेको कुनै भूमिका नहुने बरु नकारात्मक प्रभाव पर्ने भएकाले कांग्रेस र माओवादीका सुदूरपश्चिमका प्रभावशाली नेता परिचालन गर्न चन्दलाई निकटस्थहरुले सुझाव दिएका छन् ।
चन्दका लागि माओवादी नेतृ तथा पूर्व सांसद रेणु चन्दले पनि प्रधानमन्त्री प्रचण्डसमक्ष लबिङ गर्ने वचन दिएको डीआइजी निकट स्रोतको भनाइ छ । सत्तारुढ दलका प्रायः सबै सुदूर र मध्यपश्चिमका नेतालाई आफ्नो पक्षमा लबिङ गराउन डीआइजी चन्द सक्रिय भएको स्रोतको दाबी छ ।
देउवालाई भेटेर कांग्रेसलाई चुनाव जिताइदिने आश्वासन
यसैवीच आफूलाई आइजीपी बनाइनुपर्ने माग गर्दै डीआइजी चन्दले शेरबहादुर देउवासँग दुईपटक भेट गरिसकेको स्रोतले बतायो । सो भेटमा चन्दले आफू सुदूरपश्चिमको भएकाले सहानुभूति राखिदिन देउवासमक्ष आग्रह गरेका थिए । साथै उनले आगामी चुनावलाई समेत ख्यालमा राखेर नेपाली प्रहरीको आइजीपी छान्नुपर्ने देउवालाई सुझाव दिएको स्रोतले बतायो ।
आफूलाई प्रहरी संगठनको प्रमुख बनाइदिएमा कांग्रेसलाई बहुमत दिलाइदिने र एमालेलाई ठेगान लगाउन सक्नेसमेत चन्दले देउवालाई आश्वस्त पारेको स्रोतले बतायो । तर, उनका बारेमा देउवाले अहिलेसम्म केही पनि आश्वासन नदिएकाले उनी पार्टीका जिल्ला सभापतिहरु बोलाएर डेलिगेसन पठाउने तयारीमा जुटेका हुन् ।
इन्टरपोलको कार्यक्रम छाडेर दिल्ली दूतावासकाे पार्टीमा
अघिल्लो साता काठमाडौंमा इन्टरपोलको एशिया स्तरीय क्षेत्रीय सम्मेलन आयोजना गरिएको थियो । डीआइजी जयबहादुर चन्द नेपाल प्रहरीको लागू औषध नियन्त्रण ब्यूरोका प्रमुखसमेत भएकाले यो सम्मेलनमा उनको उपस्थिति महत्वपूर्ण थियो । नेपालमा लागू औषधका अपराधीहरु विदेशबाट समेत आउने गरेको सन्दर्भमा इन्टरपोलमा यसबारे भएको छलफल निकै महत्वपूर्ण थियो । तर, चन्द भने यो महत्वपूर्ण सम्मेलन नै छाडेर दिल्ली दूतावासकाे पार्टी खान गएको चर्चा पनि यतिबेला प्रहरी संगठनभित्र छ ।
यसअघि उनी दिल्ली पुगेर फर्किएका थिए । दिल्ली पुगेर फर्किएलगत्तै उनी आइजीपी बन्ने लविङमा सक्रियतापूर्वक लागेका हुन् ।
अबको केही साताभित्र एआइजीहरुबाट आइजीपी छानिएनन् र डीआइजीबाट छान्नु पर्ने अवस्था आयो भने बरियतामा सबैभन्दा अगाडि डीआइजी नवराज सिलवाल छन् । दोस्रो बरियतामा डीआइजी प्रकाश अर्याल छन् । होटल-होटलमा कांग्रेसका नेताहरु भेट्दै हिँडेका चन्दचाँहि तेस्रो बरियतामा छन् ।
डीआइजी चन्दको स्पष्टीकरण
यसैवीच डीआइजी चन्दले अनलाइनखबरलाई टेलिफोन गरेर आफू आइजीपीको दाबेदार हुनु स्वाभाविकै भएको बताए ।
होटलमा जानु र साथीभाइसँग चिया कफी खानु कुनै गलत कार्य नभएको भन्दै उनले चिया खाएकै विषयमा समाचार बनाइनु दुखलाग्दो विषय भएको बताए । ‘होटलमा साथीभाइसँग चियाकफी खानु कुन गलत काम भयो र ?’ डीआईजी चन्दले भने- ‘यो त स्वाभाविकै विषय हो ।’
भक्तपुरमा आयोजित भारतीय दूताबासको कार्यक्रममा आफू सहभागी भएको चन्दले बताए । त्यो कार्यक्रममा नेपाल प्रहरीलाई निम्तो आएकाले आफू सहभागी भएको उनले स्पष्टीकरण दिए ।
त्यसैगरी कांग्रेस सभापति शेरबहादुर देउवालाई भेट्नु पनि आपत्तिजनक विषय नभएको चन्दले बताए । उनले भने- ‘उहाँ पनि सुदुरपश्चिमको, म पनि सुदुरपश्चिमको, हामीवीच भेट त भइहाल्छ नि ।’
त्यसैगरी आफूलाई बरियताको तेस्रो डीआएजी भनिएकोमा पनि उनले आपत्ति जनाए । ‘नेपालका सबै डीआइजीहरुको बरियता एउटै हो, कनिष्ट भनिएकाबाट पनि प्रमोसन भएको नेपाल प्रहरीमा इतिहास छ । सर्वोच्च अदालतले नै बरियता नभएर एउटा पदमा रहेका प्रहरी अधिकारीहरुको एउटै स्टाटस हुने नजिर प्रतिपादन गरिसकेको छ ।’
हाल कार्यरत २६ जना डीआइजीबाट जो पनि आइजीपी चुनिन सक्ने र बरियताले नछेक्ने उनले अनलाइनखबरलाई बताए ।
यो पनि पढ्नुस्
चिनेको सुन तस्कर समाउन नसक्ने डीआइजीले कसरी चलाउलान् आइजीपी ?
