५० किलोमिटर भन्दा बढीको दौड यसैपनि निक्कै कठिन हुन्छ, त्यसमाथि खुट्टामा चप्पलमात्रै हुन्छ भने बाटो अझै मुस्किल हुन्छ ।
तर मेक्सिकोका ताराहुमारा जनजातीकी २२ बर्षीया यी युवतीको लागि भने यो दौड उनको जिन्दगीभन्दा फरक थिएन ।
मेक्सिकोको पुएब्ला शहरमा महिलाहरुको यस प्रतिस्पर्धामा मारिया लोरेना रामिरेजका अलामा १२ देशका ५०० प्रतिस्पर्धी थिए ।
दौडमा भाग लिनका लागि उनीसँग अत्यावश्यक सामागीहरुसमेत थिएन । यतिसम्म कि मारिया जुन चप्पल लगाएर दौडिएकी थिइन् त्यो टायरको रवरबाट बनेको थियो ।
ताराहुमारा जनजातीका मानिसहरु उत्कृष्ट धावक हुन्छन् । वास्तवमा यो दौडको आयोजना २९ अपि्रलमा गरिएको थियो, तर ढिला गरी आएको मारियाको जितको खवर अहिले संसारभर फैलिरहेको छ ।
धावक जनजाती
म्याराथन धावक क्रिष्टोफर म्याकडगलले ताराहुमारा समुदायका मानिसहरुको लामो दूरी दौडिने क्षमताबारे आफ्नो किताव ‘बर्न टू रन’ मा उल्लेख गरेका थिए ।
कितावमा उल्लेख भएअनुसार ताराहुमारा जातीको वस्ती दूरदराजमा फैलिएको हुन्छ । उनीहरु छिमेकी गाउँमा पुग्न तथा शिकार वा अन्य कारोबारका लागि लामो दूरी तय गर्छन् । उनीहरु समूहमा दौडन्छन्, एकअर्काले सहयोग गरी नयाँ सदस्यलाई पनि कसरी दौडने भन्ने सिकाउँछन् ।
उनीहरु दौडनुलाई एक कलाको रुपमा लिन्छन् । दौड उनीहरुको धार्मिक समारोह, पारम्परिक खेल वा प्रतिस्पर्धाको हिस्साको रुपमा हुन्छ, जहाँ महिला, पुरुष र बालबालिका सहभागी हुन्छन् ।
उनीहरु मकैबाट बनेको धेरै कार्बोहाइडेटवाला बियर (जाँड) पिउँछन्, ताकि शरीरमा पानीको मात्रा कमी नहोस् ।
उनीहरुले घरमै तयार पारिएको चप्पलको प्रयोग गर्छन्, जसको सोल समतल हुन्छ भने माथि छालाको प्रयोग गरिएको हुन्छ ।
को हुन् मारिया ?
चप्पलका अलावा मारियाले दौडका लागि स्कर्ट र स्कार्फ लगाएकी थिइन्, उनको पोशाक अब्यवसायिक देखिन्छ । उनलाई कुनै ब्यवसायिक प्रशिक्षण पनि दिइएको छैन ।
सात घण्टा तीन मिनेटमा उनले दौड पूरा गरिन् र पुरस्कार स्वरुप उनलाई ३२० डलर अर्थात ३२ हजार रुपैयाँ दिइयो ।
समाचारका अनुसार मारिया बाख्रा तथा घरपालुवा पशु चराउँछिन् । उनी हरेक दिन १० देखि १५ किलोमिटर पैदल हिँड्छिन् ।
गत बर्ष चिहुआहुआमा आयोजना गरिएको १०० किलोटिर दौडमा मारिया दोस्रो भएकी थिइन् ।