दुधको मूल्य लिटरमा १० रुपैयाँ बढ्यो

१५ पुस, काठमाडौं । सरकारी स्वामित्वमा रहेको दुग्ध विकास संस्थान (डीडीसी) दूधको मूल्य बढाएको छ । संस्थानले बुधबारदेखि लागू हुने गरी लिटरमा ८ देखि १० रुपैयाँसम्म वृद्धि गरेको हो ।

संस्थानको मंगलबार बसको सञ्चालक समिति बैठकले निलो प्याकेटको स्ट्यान्डर्ड दूधको भाउ लिटरमा ८ रुपैयाँ बढाएर ६४ रुपैयाँ पुर्‍याएको छ ।

गाईको दूधमा लिटरको ८ रुपैयाँ बढाएर ७२ रुपैयाँ पुर्‍याएको संस्थानका महाप्रबन्धक गंगा तिमिल्सिनाले बताए । यसअघि गाई दूधको मूल्य ६४ रुपैयाँ थियो ।

फ्याटयूक्त दूध (हरियो प्याकेट) मा लिटरको १० रुपैयाँ बढाइएको छ । हालसम्म लिटरको ७० रुपैयाँ तिर्दै आएको फ्याटयूक्त दूधलाई बुधबारदेखि ८० रुपैयाँ तिर्नुपर्ने भएको छ ।

बढेको मूल्य अनुसार अब उपभोक्ताले निलो प्याकेटयुक्त दूधलार्इ प्रतिप्याकेट ३२ रूपैयाँ र हरियो प्याकेट युक्त दूधलार्इ प्रतिप्याकेट ४० रूपैयाँ तिर्नु पर्नेछ ।

दूधको प्रकार	पुरानो मूल्य (लि.)	वृद्धि मूल्य	नयाँ मूल्य (लि.)
स्ट्यान्डर्ड दूध (नीलो प्याकेट)	रु. ५६	रु. ८	रु. ६४
गाइको दूध	रु. ६४	रु. ८	रु. ७२
फ्याटयूक्त दूध (हरियो प्याकेट)	रु. ७०	रु. १०	रु. ८०

किसानको चर्को दबाबलाई थेग्न नसकेर दूधको भाउ बढाएको महाप्रबन्धक लिमिल्सिनाले बताए । किसानले माग गरेभन्दा करिव ५० प्रतिशत कम मूल्य वृद्धि गरेको उनको भनाई थियो ।

किसानले दूधको मूल्य बढाउन आग्रह गर्दै विगतदेखि नै दबावमुलक कार्यक्रम गर्दै आएका थिए । किसानको दबाबपछि संस्थानमा भाउ समायोजन गर्नका लागि समिति नै गठन गरिएको थियो ।

किसानले लिटरमा २/३ रुपैयाँ बढाए मान्य नहुने भनी दबाव दिइरहेको बताउँदै तिमिल्सिनाले किसान र उपभोक्ताको हितलाई ध्यानमा राखेर मूल्य बढाएको दाबी गरे ।