काभ्रेमा बाढीमा बगेकी महिलाको अवस्था अझै अज्ञात

पनौतीमा कुलोले बगाउँदा बेपत्ता भएकी महिलाको खोजी जारी छ ।

News Summary

Generated by OK AI. Editorially reviewed.

काभ्रेमा आएको बाढीले महिलाको अवस्था अझै अज्ञात रहेको र उनको खोजी कार्य जारी रहेको छ।
बाढीले विभिन्न स्थानहरूमा सडक र यातायातको अवरोध सिर्जना गरेको छ र बाटो मर्मत कार्य भइरहेको छ।
बाढीका कारण स्थानीय बासिन्दा र यातायात सेवामा प्रभाव परेको छ।

३० वैशाख, काठमाडौं । काभ्रेमा सोमबार आएको बाढीले बगाएर बेपत्ता भएकी महिलाको अवस्था अझै अज्ञात रहेको प्रहरीले जनाएको छ । उनको खोजीकार्य जारी छ ।

सोमबार अपराह्न काभ्रेको पनौतीमा आएको बाढीले बगाउँदा पनौती नगरपालिका-५ सुब्बागाउँकी २८ वर्षीया रेनुका गिरी बेपत्ता भएकी हुन् ।

जिल्ला प्रहरी कार्यालय काभ्रेका अनुसार उनको हिजोदेखि नै खोजी सुरु गरिए पनि बेलुका भएपछि खोजी स्थगित गरिएको थियो । आज बिहानबाट फेरि खोजी सुरु गरिएको छ ।

बाढीले पनौती, कटुन्जेबेसी, बोक्सीकुना र माम्तीमा क्षति पुर्‍याएको छ । माम्तीमा दुईतर्फी नै बाटो अवरुद्ध छ । कटुन्जेबेसी, बोक्सीकुनामा एकतर्फी मात्र सञ्चालनमा छ ।

रोशी गाउँपालिकाको वडा नम्बर ११ र १२ को सिमानामा पर्ने माम्ती खोला नजिकै डाइभर्सन बगाएपछि बीपी राजमार्ग दुईतर्फी अवरुद्ध भएको हो । त्यहाँ गत असोजमा आएको बाढीले सडक बगाएपछि ह्युमपाइप राखेर अस्थाी प्रबन्ध गरिएको थियो । सो ह्युमपाइप राखेर बनाइएको बाटो पनि सोमबारको बाढीले बगाएको छ ।

सो स्थानमा आज बिहानैदेखि बाटो मर्मतको काम भइरहेको जिल्ला प्रहरी कार्यालय काभ्रेले जनाएको छ । बाटो मर्मतको काम भइरहेकाले पूर्वतर्फबाट आइरहेका सवारी साधनलाई खुर्कोट र नेपालथोकमा रोकिएको छ । यसैगरी ‘काठमाडौंतर्फबाट गइरहेका गाडीलाई भकुण्डेबेसीमा रोकिएको छ ।