१० फागुन, बारा । प्रहरी र स्थानीयबासीवीच झडपका कारण आइतबार बिहानैदेखि बाराको सिमरा बजार तनावग्रस्त बनेको छ । स्थानीयवासीले भुमिसुधार, मालपोत र नापी कार्यालय स्थापनाको माग गर्दै निकालेको शान्तिपूर्ण जुलुसमाथि प्रहरीले अन्धाधुन्ध हस्तक्षेप गरेपछि शान्ति बिथोलिएको हो ।
स्थानीयले आइतबार बिहानै निकालेको शान्तिपूर्ण विरोध र्यालीमा प्रहरीले हस्तक्षेप गरेको छ ।
आम हड्तालमा उत्रिएका स्थानीय र प्रहरीवीच आइतबार बिहानैबाट सिमरामा झडप भइरहेको छ । प्रहरीले बिहानै आन्दोलनकारीलाई तितर-वितर पार्न दुई दर्जन बढी अश्रुग्याँस प्रहार गरेको छ ।
प्रहरीको कुटाइबाट दर्जनौं आन्दोलनकारी घाइते भएको एमाले बाराका प्रचार विभाग प्रमुख कृष्ण पौडेलले जानकारी दिए । प्रहरीतर्फ पनि केही घाइते भएका छन् ।
आक्रोशित आन्दोलनकारीले सिमरा बजारमा रहेको प्रहरी बिटमा आगजनी गरेका छन् । एउटा मोटरसाइकल पनि आन्दोलनकारीले तोडफोड गरेका छन् ।
आमड्तालका कारण आइतबार पनि बिहानैबाट सिमरा क्षेत्रमा यातायातका साधन चल्न सकेका छैनन् । बजार र शिक्षण संस्थासमेत बन्द छन् ।
सिमरा बजार अहिले आन्दोलनकारीको कब्जामा छ । हजारौंको संख्यामा जम्मा भएका स्थानीयको प्रतिकारपछि प्रहरीले लुकेर अश्रुग्याँस प्रहार गरिरहेका छन् ।
भुमिसुधार, मालपोत र नापीलगायतका सरकारी कार्यालयको एकीकृत सेवा केन्द्र सिमरामा खोल्ने सरकारी निर्णय स्थगन गरेको विरोधमा शुक्रबारदेखि स्थानीयबासी आन्दोलित छन् । आन्दोलनकारीले आम हड्ताल आहृवान गरेपछि तीन दिनदेखि यस क्षेत्रको जनजीवन प्रभावित हुँदै आएको छ ।
सुनील गाउँलेबाट
