पछिल्लो समय फिल्मतिर व्यस्त भएका दयाहाङ राईले रंगकर्मीको जुनीमा फर्कने प्रयास गरेका छन्, जुनी फेर्नेहरुको कथा लिएर ।
बैतरणी नदी पार भएपछि जुरी फेरिन्छ भन्ने हिन्दु मिथकलाई एउटा क्याफेका रुपमा परिकल्पना गरेर दयाहाङले नयाँ नाटक बनाएका छन् ।
अनामनगरस्थित मण्डला थिएटरमा मञ्चन भइरहेको नाटक बैतरणी क्याफे फ्यान्टासीमा आधारित छ । पशुपक्षीहरुको एउटा समूह जुनी फर्केर वैतरणी आइपुगेको सन्दर्भबाट अघि बढेको नाटकमा मानिसको अनेक चरित्र र व्यवहारमाथि व्यंग्य गरिएको छ ।
मानिसमा हुने महत्वकांक्षाका साथै अहमता र छलकपटलाई पनि दयाहाङले नाटकमा देखाउन खोजेका छन् । फरक स्वास्र्थ बोकेकाहरु कसरी द्वन्द्वमा फस्छन् र एउटा खास संकटपछि सामूहिकतामा काम गर्छन् भन्ने देखाएको छ, जसलाई मुलुकको राजनीतिसँग जोडर पनि हेर्न सकिन्छ ।
बाँदर, बाघ, बिरोलो जस्ता जीवजन्तुको सिम्बोलिक प्रयोग गरिएको छ । दयाहाङको लेखन तथा निर्देशनमा रहेको वैतरणी क्याफेमा बाल्मीकि पोखरेल, विजया कार्की, सिर्जना सुब्बा, विजय बराल, मोहम्मद नाजिर हुसेन र उमेश तामाङले अभिनय गरेका छन् ।
अंकित खड्का विकास जोशी, संयोज गुरागाईँ, रियर राई, अनुप न्यौपाने, मिलन कार्की, रोहित पौडेल, आर्जेसी रेग्मी लगायतको पनि अभिनय छ ।
हेर्नुहोस् थप तस्वीरहरूः
