११ असोज, जनकपुर । एमाओवादी परित्याग गरेको तीन दिनपछि काठमाडौं र मधेसको दुरी घटाउन भन्दै डा. बाबुराम भट्टराई जनकपुर पुगेका छन् ।
तर, भट्टराईको झण्डै चार घण्टाको जनकपुर बसाइ निकै तनावपूर्ण रहृयो । उनले संविधान निर्माणको महत्वपूर्ण समितिको सभापतिको जिम्मेवारी लिएर पनि मधेसलाई अधिकार दिलाउन नसकेको भन्दै माफी मागे । तर, बाबुरामले नयाँ संविधान जलाउनु पर्ने भन्दै आन्दोलनकारीले मञ्च जलाइदिएका छन् ।
एमाओवादीको नेता रुवमा भट्टराई जनकपुर जान लाग्दा मधेसी मोर्चाले प्रवेश निषेधको घोषणा गरेको थियो । यो बीचमा भट्टराईले एमाओवादी र संसद सदस्य परित्याग गरे र फेरि जनकपुर जाने निर्णय लिए ।
मधेसी मोर्चाको विरोधका बीच भट्टराईले जनकपुर जाने निर्णय गरे । भट्टराई काठमाडौंको त्रिभुवन अन्तराष्ट्रिय विमानस्थलबाट उड्दै गर्दा मधेसी मोर्चा र एमाओवादीका असन्तुष्ट मधेसी नेताहरुबीच बाबुरामको उपस्थितिमा संविधानको ‘मधेस विरोधी’ धाराहरु जलाउने सहमति भयो ।
तर, नयाँ संविधानको प्रति जलाउने कुरामा बाबुरामले सहमति जनाएनन् । उनी जनकपुर विमानस्थलमा पुग्दा केही युवाहरुले विरोध जनाए । तर, यात्री निवासमा पुग्दा पूर्वमन्त्री जेपी गुप्ता उनलाई स्वागत गर्न आइपुगे ।
मधेसी मोर्चामा आवद्ध राजेन्द्र महतो नेतृत्वको सद्भावनाले संविधान जलाउने अडान लिएपछि बाबुराम गोपाल धर्मशालामा राखिएको सभा छोडेर हिँडे । उनी काठमाडौं विमानस्थल पुग्ने बेला संविधान नजलाउने सहमति भएको खबर आयो र डा. बाबुराम फर्किएर धर्मशाला पुगे ।
अधिकार दिलाउन नसकेको भन्दै माफी मागे
सभालाई सम्बोधन गर्ने क्रममा मधेस र थारुको माग पूरा भएपछि मात्र संविधानले पूर्णता पाउने बताए। संविधानसभाको सम्वाद समितिका सभापति समेत रहेका भट्टराईले महत्वपूर्ण जिम्मेवारीमा रहेर पनि मधेसलाई अधिकार दिलाउन नसकेको भन्दै माफी मागेका छन् ।
उनले आफू तराई-मधेस, हिमाल र पहाडलाई जोड्न जनकपुर आएको बताए । साथै उनले मधेसको समस्याको वार्ता र सम्वादवाटै राजनीतिक समाधान खोज्नु पर्नेमा जोड दिएका छन् । संविधान संशोधन गरेर आन्दोलनरत पक्षको जायजमा सम्बोधन गर्नु पर्ने भन्दै उनले नाकाबन्दी फिर्ता लिन र वार्तामा बस्न मधेसी नेताहरुलाई समेत आग्रह गरे ।
भट्टराईले सम्बोधन गरिरहँदा सभामा सहभागी केहीले संविधान जलाउन माग गरे । बाबुराम भट्टराई स्वंयमले संविधान जलाउनु पर्ने बताउन थालेपछि भट्टराई सम्बोधन छोट्याएर सुरक्षा घेरामा बाहिरिए ।
बाबुराम हिँडे लगतै एक समूहले मञ्चमा तोडफोड गर्नुका साथै आगजनी गरेका छन् । उनीहरुले एमाओवादीका असन्तुष्ट मधेसी नेताहरुलाई दुर्व्यवहार गरेका छन् ।
