५ बैशाख, काठमाडौ, । नेपाल विद्यार्थी संघले संगठनको झण्डा, नेपालको राष्ट्रिय झण्डा र संविधानसभाले जारी गरेको नेपालको संविधान विश्वको सर्वोच्च शिखर सगरमाथामा पुर्याउने भएको छ ।
आफ्नो ४६ औं जन्मजयन्तीको अवसरमा संघले झापाको धुलाबारी क्याम्पसका विद्यार्थी आरोही अनिष लुइटेलले नेवि संघ र नेपालको झण्डासहित नयाँ संविधान सगरमाथाको चुचुरोमा पुर्याउने जानकारी दिएको छ । उनले पर्सिबाट सगरमाथाको आरोहण सुरु गर्दैछन् ।
आइतबार रिपोर्टर्स क्लब नेपालमा पत्रकार सम्मेलनमा नेवि संघका अध्यक्ष रञ्जित कर्णले ति सामग्रीहरु आरोही लुइटेललाई हस्तान्तरण गरे ।
कर्णले नेपालको संविधान संसारकै उत्कृष्ट भएकोले विश्वकै सर्वोच्च शिखरमा पुर्याएर सकारात्मक सन्देश दिन लागिएको भन्दै लुइटेललाई आरोहणको सफलताको शुभकामना दिए ।
उनले संविधान जारी भएपछि मुलुक आर्थिक समृद्धिमा जाने विश्वास भएपनि पनि सरकारले कालोबजारीको समानान्तर अर्थतन्त्र चलाएर मुलुकको अर्थतन्त्र ध्वस्त बनाएको आरोप लगाए ।
अध्यक्ष कर्णले अब राजनीतिक क्रान्तिको युग सकिएकोले यूवा विद्यार्थीहरुको आन्दोलन सडकमा भन्दा पनि अार्थिक समृद्धिको लागि हुनुपर्नेमा जोड दिए ।
आरोही लुइटेलले संसारकै उत्कृष्ट संविधानलाई सर्वोच्च स्थानमा पुर्याउने प्रतिबद्धता ब्यक्त गरे ।
