४ जेठ, काठमाडौं । राष्ट्रिय प्रजातन्त्र पार्टी (राप्रपा)का वरिष्ठ नेता पशुपति समशेर राणाले नवलपरासीदेखि बर्दियासम्मको प्रदेशबाट पहाडी जिल्ला अलग गरे सीमांकन विवाद समाधान हुने दाबी गरेका छन् । उनले आफ्नो पार्टी दुई मधेस प्रदेशको पक्षमा रहेको स्पष्ट पारे ।
मंगलबार रिपोर्टर्स क्लबमा आयोजित साक्षात्कारमा उनले वंशजबाहेकका नागरिकलाई उच्च संवैधानिक पदमा नियुक्त गर्न नसकिने भन्दै मधेसमा जति काठमाडौंमा आन्दोलन गर्न आन्दोलनकारीलाई सजिलो नहुने बताए ।
कार्यक्रममा नेकपा एमालेका सांसद लालबाबु यादवले राजनीतिक नेतृत्वले सीमांकन गर्दा समस्या आएको भन्दै सीमांकन नेताहरुले भन्दा पनि राजनीतिकशास्त्री, भुगोलविद, अर्थशास्त्री, मानवशास्त्री र समाजशास्त्रीसहितको विज्ञहरुले मात्रै गर्न सक्ने तर्क गरे ।
उनले सीमांकनमा अधिकार र पहिचान मात्रै नभई सामर्थ्यको कुरा पनि भुल्न नहुने भन्दै यस विषयमा मधेसी मोर्चा आफै स्पष्ट नभएको दावी गरे । उनले भने,’ मधेसको मात्रै प्रदेश हुँदा त्यसले सस्टेन गर्न सक्छ कि सक्दैन हेर्नु पर्छ ।’
