६ जेठ, पाल्पा । सरकारको ‘एक नगर एक उत्पादन’ कार्यक्रमअन्तर्गत लसुन खेती पकेट क्षेत्रका रुपमा विकास गर्ने गरी रामपुर नगरपालिकालाई पकेट क्षेत्र घोषणा गरिएको छ ।
यहाँको बजार मूल्य र खपत बढी हुने गरेका कारण लसुन उत्पादनमा जोड दिँदै यसको आयातलाई शून्यमा पुर्याउने लक्ष्यका साथ नगरपालिकाले सो अभियान थालेको हो । नगर क्षेत्रमा सिँचाइ गरी लसुन खेतीबाट मनग्य आम्दानी लिन सकिने प्रशस्त सम्भावना छन् ।
रामपुर नगरपालिकाका कार्यकारी अधिकृत बाबुराम अर्यालले नगरभित्र लसुन खेती उत्पादन र विस्तारका लागि गाउँमा छलफल चलाइएको बताए । ‘नगरलाई लसुन खेतीबाट चिनाउने गरी स्थानीय उत्पादनमा जोड दिन थालेका छौँ,’ उनले भने ।
जिल्ला कृषि विकास कार्यालयका वरिष्ठ कृषि विकास अधिकृत राजेन्द्र कोइराला मसला बालीअन्तर्गत पर्ने लसुनलाई स्थानीयवासी आफैले उत्पादन नगरेसम्म पकेट क्षेत्र घोषणा नाम मात्रको हुने बताउँछन् । रासस
