जग्गा प्लटिङ गर्न कुन बैंकको कति लगानी ? (सूचीसहित)

२० असार, काठमाडौं । लगानी योग्य पुँजीको पर्याप्तता (अधिक तरलता)को चापमा रहेका बैंकहरुले लगानीका लागि नयाँ क्षेत्र नपाएपछि घरजग्गामा लगानी बढाउन थालेका छन्। खडेरी किन्न र जग्गा प्लटिङ गर्न वाणिज्य बैंकहरुले  ०७२ चैत मसान्तसम्ममा ४० अर्ब १७ करोड ६५ लाख रूपैयाँ लगानी गरेका छन् ।

उक्त शीर्षकमा बैंकहरुले एक वर्षको अवधिमा १३ अर्ब रुपैयाँले लगानी बढाएका छन् ।  ०७१ चैत मसान्तमा बैंकहरुले यही शीर्षकमा बैंकहरुले २६ अर्ब ८० करोड २५ लाख रुपैयाँ लगानी गरेका थिए ।

‘भूकम्पपछि अपार्टमेन्टमा आकर्षण घट्यो, मान्छेहरु घरजग्गामा आकषिर्त भए । मुलुक संघीयतामा जाने भएपछि मोफसलका शहरहरुमा घरजग्गामा लगानी बढेको छ ।’

लगानी बढाएपनि बैंकहरुले हाउजिङ तथा रियस्टेटमा गरेको लगानी कूल लगानीको १३ प्रतिशतमात्रै छ । एउटै क्षेत्रमा २५ प्रतिशतभन्दा बढी लगानी गर्न नपाइने राष्ट्र बैंकको व्यवस्था छ ।

एक वर्षमा १३ अर्ब रुपैयाँले कर्जा बढ्नु सामान्य भएको नेपाल बैंकस संघका अध्यक्षसमेत रहेका एनएमबी बैंकका प्रमुख कार्यकारी उपेन्द्र पौडेलले बताए ।

०७१ चैत मसान्तमा बैंकहरुको कूल लगानी १० खर्ब ९१ अर्ब रुपैयाँ थियो भने चालु आर्थिक वर्षको चैत मसान्तमा कुल लगानी बढेर १२ खर्ब ६५ अर्ब रुपैयाँ पुगेको छ । असार दोस्रो सातासम्ममा बैंकहरुको कुल लगानी १३ खर्ब ५० अर्ब रुपैयाँभन्दा बढी पुगेको छ ।

‘एक वर्षको अवधिमा बैंकहरुको कूल लगानी १ खर्ब ७४ अर्ब रुपैयाँले लगानी बढेको छ,’ पौडेलले अनलाइनखबरसँग भने- ‘यसलाई आधार मानेर हेर्ने हो भने घडेरी तथा जग्गा शीर्षकमा बढेको १३ अर्ब रुपैयाँ सामान्य वृद्धि हो ।’

तर, पछिल्लो समयमा घरजग्गाको कारोबार बढ्न थालेको र बैंकमा ऋण माग्न आउनेहरुको संख्या पनि बढेको उनले जानकारी दिए ।

‘एकातिर भूकम्पपछि अपार्टमेन्टमा आकर्षण घट्यो त्यसपछि त मान्छेहरु घरजग्गामा आकषिर्त भएका छन्,’ पौडेलले भने- ‘मुलुक संघीयतामा जाने भएपछि मोफसलका विभिन्न शहरहरुमा घरजग्गामा लगानी बढेको छ । बैंकमा ऋण माग्न आउनेहरूको संख्या बढ्दो छ ।’

जग्गाको र घर निर्माणको मुल्य पनि बढिरहेकाले १ करोडसम्मको ऋणलाई रियलस्टेटमा नगन्ने राष्ट्र बैंकको सहुलियत बढाउनुपर्ने उनको भनाई थियो ।

घडेरी तथा जग्गामा बैंकहरुको लगानी (रु. हजारमा)

यी हुन २ अर्ब बढी लगानी गर्ने बैंक

नविल बैंक, सानिमा बैंक, एसबिआइ बैंक, इन्भेष्टमेन्ट बैंक, सिद्धार्थ बैंक, प्रभु बैंक, एनबी बैंक र पूर्ण सरहकारी स्वामित्वको राष्ट्रिय वाणिज्य बैंकले घडेरी तथा जग्गामा प्रतिबैंक २ अर्ब रुपैयाँभन्दा बढी लगानी गरेको बैंकहरुले प्रकाशित गरेको चालु आर्थिक वर्षको तेस्रो त्रैमासिक वित्तीय विवरणमा उल्लेख छ ।

यी हुन् अर्ब बढी लगानी गर्ने बैंक

एघार वटा बैंकले यस शीर्षकमा १ अर्बभन्दा बढी र २ अर्ब रुपैयाँभन्दा कम लगान्ी गरेको वित्तीय विवरणमा उल्लेख छ । जसमा सिटिजन्स बैंक, लुम्बीनी बैंक, स्टान्डर्ड चार्टर्ड बैंक, एनआइसी एसिया, एनएमबी बैंक, कुमारी बैंक, हिमालयन बैंक, मेगा बैंक, माछापुच्छ्रे बैंक र नेपाल बैंक छन् ।

यी हुन् थोरै लगानी भएका बैंक

लक्ष्मी बैंक, एनसीसी बैंक, बैंक अफ काठमाण्डू, जनता बैंक, एभरेष्ट बैंक, सनराइज बैंक र सेञ्चुरी बैंकले यस शीर्षकमा १ अर्ब रुपैयाँभन्दा कम लगानी गरेका छन् । कृषि विकास बैंकले आफ्नो वित्तीय विवरणमा यो शीर्षक नै उल्लेख गरेको छैन ।