नायिका झरना थापाले आफ्नो नयाँ चलचित्र ‘ए मेरो हजुर’को छायांकन यतिबेला काठमाण्डौमा धमाधम गरिरहेकी छिन् । ‘ए मेरो हजुर २’ नाम राखेर चलचित्र बनाउने बताइपनि पुरानै चलचित्रको नाम सापटी लिइएको छ ।
एस.के थापा प्रोडक्शनको ब्यानरमा यो चलचित्रको छायांकन काठमाण्डौमा भैरहेको छ । २ दिन पछि चलचित्र खिच्नका लागि पोखरा जाने निर्माता सुनिल कुमार थापाको भनाई छ । उनले चलचित्रको नाम ‘ए मेरो हजुर’ मात्र राखिएको पुष्टी गरे ।
यो चलचित्रमा नायिका साम्राज्ञीराज्य लक्ष्मी शाह मुख्य भूमिकामा छिन् । चलचित्रका मुख्य नायकको भने नाम र तस्बिर लुकाएर छायांकन भैरहेको थियो । तर, चलचित्रमा साम्राज्ञीसँग सलिममान बाँनिया नाम गरेक यूवकले रोमान्स गरिरहेको वुझिएको छ । सलिम २२ बर्षका छन् । चकलेटी अनुहारका धनी सलिम नृत्यमा पोख्त छन् ।
नायिका झरना थापाले पहिलो पटक निर्देशन गर्न लागेको यो चलचित्रलाई लिएर अहिले निर्माणपक्ष नै उत्साहित देखिएको छ । बसन्त सापकोटाले चलचित्रमा संगीत भरेका हुन् । प्रेम कथामा आधारित रहेर यो चलचित्र तयार हुने बताइएको छ । चलचित्रमा विल्सन विक्रम राई, सलोन बस्नेत, अनुराँग मान सिंह कुँवर, अनुभव रेग्मीको पनि मुख्य भूमिका रहनेछ ।
