मस्ती टकः बिहेपछि पनि लभ भयो, लुकिछिपी डेटिङ जान्थेँ(भिडियो कुराकानी)

नेपाली चलचित्रका सुपरस्टार तथा सदाबाहार नायक हुन् भूवन केसी । केहि दिन अगाडि मात्र अमेरिकाबाट फर्किएका भूवनलाई अहिले ज्वरोले सताएको छ । अमेरिकामा हिउँ खेल्दा चिसोले ज्वरो आएको भूवनको भनाई छ । अनलाइनखबरसँग ‘मस्ती टक’मा रमाइलो कुरा गर्ने क्रममा भूवनले निकै सोचेर जवाफ दिए । कलाकारले कुन कुरा बोल्ने र कुन नबोल्ने भन्ने बारेमा सोच्नु पर्ने भन्दै भूवनले सोचेरै जवाफ दिए ।

भूवनले आफूलाई पहिलो पटक जाँदा अमेरिका रमाइलो लागेपनि अहिले भने खासै रमाइलो नलाग्ने बताए । अमेरिका पुगेको १० दिनभित्र नै नेपाल फर्कन  मन लाग्ने भूवनले सुनाए ।

आफूलाई सबै प्रकारका संगीत मनपर्ने भन्दै उनले गाडीमा घुम्न, राम्रा-राम्रा कपडा लगाउन मन लाग्ने बताए । पहिरनको मामलामा भूवन सधै नै चर्चामा रहन्छन् ।
उनले सबै पहिरन आफूले नै छान्ने बताए । आफ्नो जीन्दगीको आधा कमाई पहिरनमा नै गएको उनले सुनाए । आफ्नो घरमा ८-१० वटा दराजमा लूगा भएको उनले बताए ।

भूवनसँग गरिएको ‘मस्ती टक’को भिडियो यहाँ हेर्नुहोस्ः

तपाइलाई किन बारम्बार महिलासँग जोडिन्छ भन्ने प्रश्नमा भूवनले भने-‘म रोमान्टिक हिरो हुँ । म चलचित्रमा जस्तो रोमान्टिक छु, बाहिर पनि उस्तै रोमान्टिक छु ।’
आफूले बोल्ने ‘बाबा, बाबु’ भन्ने शब्दमा प्रेम भएको र त्यसले गर्दा पनि धेरै आकर्षित भएको हुनसक्ने भूवनको वुझाई छ । आफ्नो जीवनमा धेरै महिला साथी भएको भन्दै उनले संसारभर जहाँ गएपनि प्रेम पाउने गरेको बताए ।

बिहे भन्दा अगाडि कति जना महिलासँग प्रेम थियो भन्ने प्रश्नमा भूवन केहिबेर सोचमा पुगे । उनले भने-‘थियो होला २-३ जनासँँग । नायक हुनु भन्दा अगाडि म गायक थिएँ ।’

बिहेपछि पनि आफू प्रेममा परेको, डेटिङ गएको उनले खुलाए । डेटिङ जाँदा श्रीमतिबाट कुनै प्रतिक्रिया आउँदैनथ्यो भन्ने प्रश्नमा उनले भने-‘उहाँ रिसाउनु त हुन्थ्यो, तर पनि लुकिछिपी जान्थेँ ।’

नायिका जीया केसीसँग आफू लिभिङ टूगेदरमा नरहेको खुलस्त पार्दै भूवनले उनी आफ्नो मिल्ने साथी भएको बताए । जीया आफ्नो घरमा आउने, खाना खाने गरेपनि सँगै भने नवसेको भूवनको भनाई छ ।

छोरा अनमोल केसीसँग आफूले प्रेम, व्यवहारिक कुरा गर्ने गरेको र उनी आफ्नो मिल्ने साथी भएको बताए ।