२८ फागुन, काठमाडौं । बागमती सफाइ अभियानको २ सय हप्ता पूरा भएको अवसरमा शनिबार प्रधानमन्त्री प्रचण्डदेखि लिएर प्रशासक, विद्यार्थी, कलाकार, सुरक्षाकर्मी एवं सर्वसाधारणले वागमती किनारमा भेला भएर ऐक्यवद्धता जनाएका छन् ।
प्रधानमन्त्री प्रचण्डले शंखमुलमा आयोजित कार्यक्रममा सहभागिता जनाए । प्रधानमन्त्रीमा साथमा मन्त्री, मुख्य सचिव लगायत उच्च सरकारी अधिकारीहरु सहभागी थिए ।
त्यसैगरी पूर्वप्रधानमन्त्री डा. बाबुराम भट्टराई दम्पतीले नयाँ शक्तिको लोगो अंकित ज्याकेट लगाएर बागमती सफाइमा सहभागिता जनाए ।
धुर्मुस, सुन्तली, जितु नेपाल लगायतका कलाकारहरु पनि ब्यानरसहित अभियानमा सहभागी बने । धुर्मुस र सुन्तली नेपाल सरकारका सफाइ दूतसमेत हुन् ।
वागमती सफाइ अभियन्ता तथा चीनका लागि नेपाली राजदूत लीलामणि पौडेल पनि वागमती सफाइ अभियानमा सहभागी बने ।
शनिबार बिहानैदेखि पानी दर्किएका कारण अभियानमा केही कठिनाइ उत्पन्न भए पनि पानीको परबाह नगरी विभिन्न विद्यालयका वालवालिका एवं वयस्कहरु वागमती किनारमा भेला भएका थिए ।