भारतीय च्यानलबाट प्रसारित रियालिटी शो ‘डान्स इन्डिया डान्स’ र ‘झलक दिखलाजा’ कार्यक्रमकी विजेता तेरिया फौजा मगरलाई उनको गृह जिल्ला रुपन्देहीमा सम्मान गरिएको छ ।
भैरहवाका समाजसेवी सत्यलाल हिराचनले तेरिया ‘झलक दिखलाजा’को विजेता भएर अन्तरराष्ट्रिय जगतमा नेपाल र नेपालीको नाम फैलाउन सफल भएकोमा नगद र सम्मानपत्र सहित सम्मान गरेका छन् ।
शनिवार भैरहवामा एक कार्यक्रमको आयोजना गरी तेरियालाई एक लाख रुपैयाँ र सम्मान पत्र सहित सम्मान गरिएको कार्यक्रमकी संयोजक रमिता थापा मगर केसीले बताइन् ।
राष्ट्रिय प्रतिभालाई नागरिक समाजबाट आफ्नो गच्छे अनुसार प्रोत्साहन स्वरुप केही न केही सहयोग गर्नुपर्छ भन्ने मनमा लागेको कारण तेरियालाई सम्मान गरिएको समाजसेवी हिराचनले बताए ।
तेरिया सन् २०१४ मा डीआइडी र सन् २०१७ मा झलक दिखलाजा कार्यक्रमकी प्रथम विजेता भएकी थिइन् । कार्यक्रममा तेरियाले ‘डाँफे झै नाँच्ने, हिमाल झै हास्ने, नेपालकी छोरी हुँ म’ भन्ने गित गाएकी थिइन् ।