२७ भदौ, काठमाडौं । महिला, बालबालिका तथा समाज कल्याणमन्त्री आशा कोइरालाले मन्त्रालयमा बस्ने कुर्सीदेखि बोक्ने फाइलसम्म महिलामैत्री नभएको गुनासो गरेकी छन् ।
मंगलबार मन्त्रालयमा आयोजित पत्रकार भेटघाटमा मन्त्री कोइरालाले भनिन्, ‘सरकारी कार्यालयहरूमा कुर्सी, टेबुल र भर्याङ मात्र होइन, हामीले बोकेर हिँड्ने फाइलसमेत पुरुषमैत्री छन् ।’
महिलाले सानो हाते व्याग बोकेर हिँड्ने हुनाले मन्त्रालयका फाइलहरू व्यागमा नअटाउने र हातैमा बोकेर हिँड्नुपर्ने बाध्यता उनले सुनाइन् ।
समाज कल्याण परिषदको अध्यक्षको कुर्सीमा बस्दासमेत आफूलाई अप्ठेरो हुने गरेको उनले बताइन् । कोइरालाले मन्त्रीहरुले समेत यस्तो अप्ठेरो भोग्नुपरिरहेको अवस्थामा अन्यत्र काम गर्ने महिलाले झनै चुनौतीको सामना गर्नुपरेको बताइन् ।
नेपाली समाज पुरुषप्रधान रहेकाले त्यसको प्रतिविम्व सिंहदरवारमा पनि रहेको उनको धारणा छ ।
मन्त्री कोइरालाले विभेद तथा कुरीतिको अन्त्य र महिलामाथिका हिंसा नियन्त्रण गर्न सबै स्थानीय तहमा तत्काल उद्धार टोली (र्यापिड, रेस्पोन्स र एक्सन टिम) गठन गर्नुपर्ने धारणा राखिन् ।
