शुक्रबार, ८ असार, २०७५
Ruslan
OnlineKhabar.com
Suzuki

‘ओलीको नेता प्रचण्ड, प्रचण्डको नेता ओली’

पार्टी एकता गर्दा धोका भयो भन्नु अराजनीतिक टिप्पणी

Suzuki
अनलाइनखबर

एमाले-माओवादी केन्द्र तालमेलका सूत्रधार मध्येका एक हुन् जनार्दन शर्मा । अघिल्लो दिनसम्म एकअर्कालाई गाली गलौज गर्ने केपी शर्मा ओली र प्रचण्डबीच यो एकता कसरी सम्भव भयो भनेर हामीले तिनै शर्मासँग कुराकानी गरेका छौंः

एमाले र माओवादीबीच तिक्ततापूर्ण सम्बन्ध थियो । दशैंको बेलामा एकाएक सरप्राइज दिनुभयो त ?

अहिलेको माओवादी केन्द्र र एमाले, कम्युनिस्ट पार्टीका दुई शाखाका रुपमा छन् । एक कालमा अहिलेको माओवादी तत्कालीन चौथो महाधिवेशन समूहमा थियो । अहिलेको एमाले त्यतिबेला कोअर्डिनेसन केन्द्र थियो, चौमले त्यसलाई उग्रपन्थी भन्यो । अर्को एउटा काल आयो, त्यो चौमलाई तत्कालीन मालेले उग्रपन्थी भन्यो । हुन त, सशस्त्र विद्रोह भनेर झापा आन्दोलन अहिले एमालेमा भएका नेताहरुले गरेका हुन् । हामीले जनयुद्ध गर्‍यौं । त्यसरी हेर्दा सशस्त्र क्रान्ति दुवैले गरेका थिए ।

तर, जनयुद्ध, जनआन्दोलन हुँदै नयाँ संविधान बनाएर यहाँसम्म आइपुग्दा दुवै पार्टीका सैद्धान्तिक र बैचारिक आधार एउटै जस्तो हुन पुगेको छ । मुलतः नयाँ संविधानका संघीय लोकतान्त्रिक गणतन्त्र, धर्मनिरपेक्षता, समानुपातिक, समावेशीतालगायत विषयमा सहमति बन्न पुग्यो । आर्थिक समृद्धि र समाजवादको आधार तयार गर्ने मुल सहमति बन्न पुग्यो ।

यो बैचारिक सहमति बन्ने र अलग-अलग पार्टीमा रहेर एकअर्कालाई आरोप लगाउने अन्तरविरोधी कुरा भए । यद्यपि, सहकार्य गर्ने प्रयास भयो । संयुक्त सरकार पनि बन्यो तर केही असमझदारी बन्यो, गठबन्धन तोडियो र तिक्तताको स्थिति रह्यो । त्यो ‘टसल’मा एकअर्कालाई आरोपित गर्दागर्दै ग्राउन्डमा सैद्धान्तिक आधार एउटै बन्नुले त्यसलाई सहकार्यमा बदल्ने परिस्थिति तयार भएको छ ।

दुई पार्टीका अध्यक्ष त एक अर्कामाथि गाली गलौजमै उत्रिएका थिए । अघिल्लो दिनसम्म गाली गरिरहेका नेता भोलिपल्ट कसरी मिले ? यो कसरी सम्भव भयो ?

सरकारमा सहकार्य गर्ने भनेको हो, गरिराखेका छौं ।चुनावअघि सरकार ढाल्छौं भनेका छैनौं । तर, हामीले बिचार र एजेन्डा मिल्नेसँग पार्टी एकता गर्दा धोका भयो भन्नु अराजनीतिक टिप्पणी हो

गालीगलौजभन्दा पनि राजनीतिक आरोप-प्रत्यारोप थियो । तर, उहाँहरु दुवै (प्रचण्ड-केपी ओली)ले एकअर्काको आवश्यकता महशुस गर्नुभयो, एकअर्काको अस्तित्व स्वीकार्नुभयो । त्यसको आधार मैले माथि नै भनिसकेँ ।

उहाँहरुले मुलुकलाई राजनीतिक स्थायित्व दिनसक्ने, आर्थिक समृद्धि गर्ने र संविधान कार्यान्वयनलाई अझ सफलतापूर्वक लैजान सक्ने सम्भावनालाई हेर्नुभयो । सैद्धान्तिक आधार पनि फरक छैन र शान्तिपूर्ण प्रतिस्पर्धाको माध्यमबाट आर्थिक समृद्धि, स्वाधिनता हुँदै समाजवादको आधार तयार गर्ने लक्ष्यमा समानता भएपछि व्यक्तिगत ‘टसल’ र आवेगमा लगाइएका आरोपहरु टिकिरहन सक्दैनन् ।

 

तीन दलबीच गठबन्धन बन्ने कुरा कल्पनाबाहिर भए पनि सम्भव भएको छ । यस्तो असम्भव कुरालाई सम्भव बनाउने पात्र को को हुन् ?

मुख्य कुरा नेपाली जनता हुन् । नेपाली जनताको माग र आवश्यकतालाई हाम्रा नेताले महशुस गर्नुभयो । बाँकी पात्र त को हुन्छन्, त्यो महत्वको कुरा होइन ।

एउटा आम जिज्ञासा, केपी ओलीको नेता प्रचण्ड हुन् कि प्रचण्डको नेता केपी ओली ?

एकता प्रक्रियामा गएर समायोजन समिति बनाउँदै गर्दा एमाले र माओवादी केन्द्रका अध्यक्षहरु प्रमुख नेताका रुपमा रहनुहुनेछ भनेका छौं । त्यसैले अब केपी ओलीको नेता प्रचण्ड पनि हो र प्रचण्डको नेता केपी ओली पनि हो । दुइटै दुइटैका नेता हुन् ।

नेता अलिकति तयार भएर पनि होला उत्साहित छन् । तर, कार्यकर्ता पंक्ति निरास र तयार नभएजस्तो देखियो, अलि बढी नै गरियोजस्तो लाग्दैन ?

निर्वाचनमा देखिएको टसल, सरकारको सहकार्य हेर्दै गर्दा तत्काल नै एमाले र माओवादीबीच कुनै सहकार्य हुँदैन होला भनेर बसेका कार्यकर्तालाई एकता नै गर्नेभन्दा सरप्राइज त लागेको छ । तर, यसका आधारहरुमा गएर विश्लेषण गर्दा सहज अवस्थामा जान्छ ।

किनभने, हाम्रो पार्टीमा अध्यक्ष प्रचण्डले ०६४ सालको काभ्रेस्थित फूलबारी बैठकमा एमालेसँग एकता गर्ने प्रस्ताव नै पारित गराउनु भएको छ । त्यसपछि दुई पार्टीबीच धेरै छलफल भएका छन् । त्यो क्रम एउटा अंशमा निरन्तर जारी थियो, आज समग्रमा हुनपुग्यो ।

सरकारमा कांग्रेससँग हुनुहुन्छ । स्थानीय चुनावमा तालमेल पनि भएको थियो । कांग्रेसलाई किन छाड्नुभयो ? उसले त अनैतिक भयो, धोका भयो भनेको छ नि ?

मुख्य कुरा पार्टी एकता गर्नु कसैलाई धोका दिनु होइन । प्रेमी-प्रेमिकाले विवाह गरे भने कसैलाई धोका हुँदैन नि, त्यस्तै कुरा हो यो । कांग्रेससँग त माओवादीको पार्टी एकता कहिल्यै हुन सक्दैन । हामीले भनेका पनि थिएनौं ।

सरकारमा सहकार्य गर्ने भनेको हो, गरिराखेका छौं । हामीले चुनावअघि सरकार ढाल्छौं भनेका छैनौं । हामीले बिचार र एजेन्डा मिल्नेसँग पार्टी एकता गर्दा धोका भयो भन्नु अराजनीतिक टिप्पणी हो ।

औपचारिक रुपमा वाम गठबन्धनबारे कांग्रेसले आफ्नो धारणा सार्वजनिक गर्ने नै छ । त्यसभन्दा पहिले व्यक्तिगत रुपमा केही गुनासो पनि पाउनु भएको छ कि ?

पत्रपत्रिकामा नयाँ गठबन्धनबारे कांग्रेसका साथीहरुले प्रतिक्रिया जनाउनु भए पनि व्यक्तिगत रुपमा त्यस्तो गुनासो गर्नु भएको छैन । पार्टी एकताका लागि गठबन्धन बनाएर जाने निर्णय भएकाले उहाँहरुले यसमा दुःख मान्नुपर्ने कुनै कारण छजस्तो मलाई लाग्दैन ।

फेरि हामीले कांग्रेस मन नपरेर नयाँ गठबन्धन बनाएका पनि त होइनौं नि ! तालमेल त हामीले कांग्रेससँग पनि गर्‍यौं, यसका आफ्नै अनुभव छन् । यसबारे अहिले धेरै टिप्पणी नगरौं । तर, यो गठबन्धन त पार्टी एकताअन्तर्गत भएको हो । त्यसैले यो विगतको गठबन्धनभन्दा नितान्त फरक कुरा हो । कांग्रेसका साथीहरुले यसलाई यसरी नै बुझ्नुपर्छ ।

गृहमन्त्री आफैं गएर विपक्षी पार्टीसँग भएको सहमति वाचन गरिदिनुभयो भन्ने पनि छ नि ?

म गृहमन्त्री भएर सहमतिपत्र वाचन गरेको होइन । मेरो पार्टी अध्यक्षले गर भनेर आदेश दिएपछि मैले गर्नुपर्छ । मैले गृह मन्त्रालयको तर्फबाट गरेको त होइन । आज प्रधानमन्त्रीले केही पढ भन्नुभयो भने त्यही पढ्छु सरकारको तर्फबाट ।

तर, कांग्रेस पनि तालेमल गरौं भनेको थियो नि ?

तालमेल मात्र गर्ने हुँदा कांग्रेससँग कुराकानी भएको थियो । तर, हाम्रो कुरा तालमेल मात्र रहेन, पार्टी एकता नै गर्ने भयौं । पार्टी एकता एमालेसँग गर्ने अनि कांग्रेससँग तालमेल गर्न त मिलेन । पार्टी एकता नगरेर एमालेसँग तालमेल मात्र गरेको भए कांग्रेसले भन्ने ठाउँ थियो । तर, हामीले पार्टी एकता गर्दैछौं ।

आ-आफ्नो चुनाव चिन्हबाट लडेपछि तालमेल नै त भयो नि ?

अहिले त प्राविधिक कारण छ । एउटै पार्टी दर्ता गर्न नपाइने भएकाले मात्र हो । यदि पाइन्थ्यो भने नेपाल कम्युनिस्ट पार्टी दर्ता गथ्यौर्ं र एउटै चुनाव चिन्हमा चुनाव लड्थ्यौं । यदि कसैले यसलाई तालमेलका रुपमा मात्र बुझ्यो भने गलत हुन्छ ।

तर, यो चुनावी स्वार्थले मात्र भएको हो । एकता भने पनि यो तालमेलमै सीमित हुन्छ भन्छन् नि ?

यो त भन्नेहरुको कुरा भयो । के गर्‍यौं त हामीले भन्ने हो र हामीले जे भन्छौं, त्यही हो । अरुले बाहिर टिप्पणी गरेर केही हुन्न । भने नि त, तिमीलाई धोका हुन्छ, यो हुन्छ, त्यो हुन्छ अनेक कुरा भनिरहेका छन् ।

हाम्रो कुरा के हुन् भने हामी कम्युनिस्ट आन्दोलनलाई एकीकृत गरेर एउटै कम्युनिस्ट पार्टी निर्माण गर्ने उद्देश्यसहित अगाडि बढेका छौं । यो न कसैलाई धोका हो, न कसैलाई घात । यो हाम्रो राजनीतिक स्वतन्त्रता हो र हामीले निर्णय गर्‍यौं । भोलि कांग्रेसले पनि अरु कसैसँगै (एकता वा तालमेल) गर्छ होला, गर्न खोजिरहेको पनि छ । त्यसलाई हामी धोका दियो भन्दैनौं, समर्थन गर्छौं ।

चुनावचाहिँ यही सरकारले गराउँछ होइन ?

एमालेले पनि प्रत्यक्ष निर्वाचित कार्यकारी प्रमुख चाहिन्छ भनेर संविधानसभामा भनेको हो । हामीले कार्यकारी राष्ट्रपति नै चाहिन्छ भनेर भिन्न मत राखेकै छौं भने कार्यकारी भन्नेमा अन्तर छैन

हो, आगामी १० र २१ मंसिरमा हुने प्रतिनिधिसभा र प्रदेशसभा चुनाव यही सरकारले गराउँछ ।

यसमा फेरबदल, तलमाथि हुने सम्भावना छ कि छैन ?

कांग्रेसले नै सरकार छाड्यो भने त्यो अर्कै कुरा हो । तर, हाम्रोतर्फबाट फेरबदल गर्ने कुरा हुँदैन । यसमा सबै प्रष्ट भए हुन्छ ।

पछिल्लो विकसित राजनीतिक घटनाक्रमपछि चुनाव नै नहुने हो कि भन्ने आशंका पनि व्यक्त हुन थालेका छन् । यसलाई तपाईंले कसरी लिनुभएको छ ?

निर्वाचन निर्धारित मितिमै हुन्छ । संविधान र आमजनताले तय गरिसकेको निर्वाचनबारे अब आशंका गरिराख्न जरुरी छैन ।

प्रधानमन्त्रीको पुरानो ट्रयाक रेकर्ड राम्रो छैन । त्यसलाई हेरेर मानिसहरुले शंका गरेका छन् नि ?

यो पुरानो मान्यता हो । उहाँले अब यस्ता पुराना मान्यता लागू गराउन मिल्दैन ।

एमाले र माओवादी केन्द्रबीच तराई मधेशलाई हेर्ने दृष्टिकोणमा ठूलो अन्तर छ । शासकीय स्वरुपमा पनि तपाईंहरु प्रत्यक्ष निर्वाचित कार्यकारी राष्ट्रपति भनिरहनु भएको छ, एमाले संसदीय प्रणालीमा छ । यसमा समान धारणा बनिसक्यो ?

त्यो ६ बुँदे सहमतिमै प्रष्ट छ । अहिलेका उत्पीडित जाति, वर्ग, क्षेत्र, लिंग, महिला, मधेशलगायत बाँकी कुरा पूरा गर्ने र संविधान संशोधन गर्ने लेखिएकै छ ।

संविधान संशोधन गर्छु त एमालेले पनि भनेको हो । तर, सीमांकनसहितका मुद्दामा त एमाले र माओवादी दुई ध्रुवमा छन् । यसमा के गर्नुहुन्छ ?

हाम्रो जे सहमति भएको छ । त्यो साझा कुरा हो ।

भोलि संविधान संशोधन गर्दा अहिले एमालेले भनेजस्तो हुन्छ कि माओवादीले ?

त्यो अहिले हामीले सहमति गरेजस्तो हुन्छ । पार्टीको दस्तावेज, घोषणा पत्रहरु बनाउन बाँकी नै छ । धेरै सैद्धान्तिक वैचारिक कुराहरु त्यसक्रममा छलफल गर्छौं ।

शासकीय रुपमा प्रत्यक्ष निर्वाचित कार्यकारीमा जाने सहमति हो ?

एमालेले पनि प्रत्यक्ष निर्वाचित कार्यकारी प्रमुख चाहिन्छ भनेर संविधानसभामा भनेको हो । हामीले कार्यकारी राष्ट्रपति नै चाहिन्छ भनेर भिन्न मत राखेकै छौं भने कार्यकारी भन्नेमा अन्तर छैन । कार्यकारी राष्ट्रपतिबारे के हो भन्ने घोषणा पत्रमा आउँछ ।

साझा घोषणा पत्र र साझा उम्मेदवार भएपछि प्रधानमन्त्री र मुख्यमन्त्रीहरु पनि साझा उम्मेदवार आउँछन् ?

घोषणा कतिबेला गर्ने, त्यो प्राविधिक कुरा हो । तर, संसद्का उम्मेदवार साझा भएपछि माथिका उम्मेदवार पनि साझा नै हुन्छन् ।

नेपालका कम्युनिस्टहरु माओका चौथी पत्नीलाई हेर्ने दृष्टिकोणमा कुरा नमिलेर पनि फुटेका छन् । जनयुद्धलगायत विगतका आन्दोलनलाई हेर्ने कुरामा पनि तपाईंहरुबीच मतैक्यता छैन । यी कुराहरुलाई अब कसरी मिलाउनु हुन्छ ?

कम्युनिस्ट पार्टीले इतिहासको समीक्षा गर्छ । हामी पनि साझा घोषणापत्र बनाउने क्रममा विगतको समीक्षा गछौं । जनयुद्ध, जनआन्दोलन, झापा आन्दोलनको ऐतिहासिक महत्व र यसको राजनीतिक अर्थबारे धारणा बनाउँछौं । हाम्रा ऐतिहासिक सन्दर्भ र घटनाक्रमहरुबाट हामी अलग हुँदैनौं, त्यो सन्दर्भलाई आवश्यकतासँग जोडेर हामी अगाडि बढ्छौं ।

उसो भए विगतलाई हेर्ने दृष्टिकोणमा विवाद भएर पार्टी एकता रोकिँदैन ?

यसमा विवाद हुँदैन, हामी सहमति गरेर नै अगाडि बढ्छौं ।

६०/४० को भागबण्डा गरेर चुनावमा जाने भन्नुभएको छ । यो हरेक जिल्ला र प्रदेशमा हुन्छ कि शक्ति र प्रभावका आधारमा मिलाउनु हुन्छ ?

त्यो आममा हुन्छ । कुनै प्रदेशमा कसैको कम र कसैको बढी होला, कतै बराबर होला । तर, धनकुटा, जहाँ स्थानीय तहमा एमालेले क्लिनस्विप गरेको छ, मा माओवादी र रुकुम, जहाँ स्थानीय तहमा माओवादीले क्लिनस्विप गरेको छ, मा एमालेका उम्मेदवार पनि हुनसक्छन् । यी कुराहरु सहमतिअनुसार हुने भएकाले अहिले नै यसै हुन्छ भनेर म भन्न सक्दिनँ ।

देशमा एउटै कम्युनिस्ट पार्टी बन्छ र संविधानले परिकल्पना गरेअनुसार समाजवादको कार्यान्वयनमा जान्छ भन्नेमा तपाईं व्यक्तिगत रुपमा ढुक्क हुनुहुन्छ ?

हाम्रो देशको उन्नति-प्रगति गर्न धेरै वर्ष लाग्दैन, १५ वर्षमै समृद्धि ल्याउन पर्याप्त छ । तर, यसका लागि हामीले आफ्नोतर्फबाट त्याग गर्न तयार हुनुपर्छ । समाजवादउन्मुख अवधारणा बोकेको हाम्रो संविधानले गाँस, बास, कपास, स्वास्थ्य, शिक्षा, रोजगार भनेको छ । अर्थात्, कपासदेखि खाद्य सम्प्रभुतालगायत अधिकार दिने भनेको छ । यो कुरा त हामीले लागू गर्न पर्‍यो नि ?

राजनीतिक परिवर्तनसँगै आर्थिक समृद्धिमा देशलाई अघि बढाउनु राजनीतिक दलहरुको अहिलेको मुख्य कार्यभार हो । यदि हामी कम्युनिस्ट पार्टी हौं भने यसबाट विचलित हुन मिल्दैन । त्यसकारण हाम्रो एकता सफल हुन्छ । हो, हामीबीच केही सैद्धान्तिक मतभेद छन्, त्यसलाई बहस र छलफल गर्दै आगामी दिनमा समाधान निकाल्ने छौं ।

नेपालको राजनीतिलाई भूराजनीतिले पनि असर पार्छ भनिन्छ । यो गठबन्धनबाट उत्तर उत्साहित र दक्षिण निरास बनेका कुराहरु आइरहेका छन् । यथार्थ यस्तै हो कि फरक छ ?

यो कुरा मेरो जानकारीमा छैन । कसैका विरुद्ध हाम्रो गठबन्धन लक्षित नभएकाले कोही पनि यसबाट उत्साहित र निरास हुन जरुरी छैन । यो राजनीतिक पार्टीको निर्णय गर्ने स्वतन्त्र अधिकार प्रयोग गर्दै गरिएको हो । आफ्नो अधिकार प्रयोग गर्दै हामीले गठबन्धन निर्माण गरेको हुनाले हाम्रो सम्बन्ध आगामी दिनमा सबैसँग सन्तुलित हुनेछ ।

 

 

२०७४ असोज १९ गते २०:२७ मा प्रकाशित (२०७४ असोज २० गते १०:३३मा अद्यावधिक गरिएको)
Grace
Grace

सम्बन्धित शीर्षकहरु

अनलाइनखबर सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

मुख्य खबरहरु

५ प्रतिकृयाहरू प्राप्त
  • chandra लेख्नुहुन्छ    |   २०७४ असोज १९ गते १३:४५

    Kale Kale milera khaaun Vale matrai bhako ho yo milan! Bhale marne bela samma ta milan tikxa! Tara, khane bela ma “MAHABHARAT” suru hunxa!

    Pahilo patak, huna sakxa Prachanda Rastrapati ra KP Oli PM huna ko laagi sambhav hola ra dherai birodh nahola! Tara, anya PAD ra dosro patak KURSI ko lagi yeti lafada hunxa ki bhani sadhya hundaina!!!

    14
    5
    Share

  • R_R लेख्नुहुन्छ    |   २०७४ असोज १९ गते १३:४६

    aafno khuttama afai bancharo hanne haru aba agadi badna garo chha….timi haru apanga vaisakyou. Trump ra kim jong uun ko mitrata huna nsakne jastai prachanda ra ukhaane ko mitrata kebal dekhawati matrai ho,afno swartha purti ko lagi matra. heram kati din chaldo raichha yo maha natak.

    7
    7
    Share

  • up लेख्नुहुन्छ    |   २०७४ असोज १९ गते १६:३४

    Bigat ma Desh ko luteko sampati lukaun ra jogaun matra mileko hau. Aru kehi karan chhaina. Aajhai miler Desh lut, Desh vad ma jaosh .
    Afno afno bhaktigad swarth ko lagi ho .

    3
    0
    Share

  • पविन लेख्नुहुन्छ    |   २०७४ असोज २० गते २:४८

    साथीहरु साह्रै डराउनु भए जस्तो छ कम्युनिष्टहरुको एक हुने प्रकृया शुरु भएको देखेर, कांग्रेसलाई साईड लाएर दस पन्ध्र वर्षको दिगो सरकार चलाएर नेपाल बनाउने परे भन्ने देखेर केहि नालायक पार्टी मा आस्था राख्ने अन्धाहरु जो पुर्खाको पाटी भनि भोट चढाई अन्धविश्वास लाई प्रोत्साहन दिन्छन् हो त्यस्तालाई पित्त फुट्ने गरी पिर परेको छ हरे र तिनीहरु भुइँचालो आयो भनि दौडिन थालेका छन् हरे बाटा बाटामा..हावाको भुइँचालो बाट बचौ र यो घटनाबाट मानसिक सन्तुलन गुमाउन पुगेकालाई भारत तिर उपचार गर्न पठाउने वेवस्था कम्युनिस्ट सरकारले गरिदिने छ,हाहाहा

    4
    3
    Share

  • keshav लेख्नुहुन्छ    |   २०७४ असोज २० गते १२:४२

    khoi hamro comment..
    hawa news portal po ra6 yo ta, toit bekar

    1
    0
    Share

यसमा तपाइको मत




फेसबुकबाट तपाईको प्रतिक्रिया

Also you may like this