७ माघ, रामेछाप । रामेछापमा ज्यान मुद्दाका एक फरार अभियुक्त २९ वर्षपछि पक्राउ परेका छन् ।
जिल्ला प्रहरी कार्यालय रामेछापले कर्तव्य ज्यान मुद्दामा फरार रहेका रामेछापको भूजीका हरिबहादुर सुनुवार भनिने कुमार सुनुवारलाई शनिबार पक्राउ गरेको हो ।
जिल्ला अदालत रामेछापबाट ज्यान मुद्दामा १० वर्ष कैद सजाय तोकिएका सुनुवार ०४५ सालदेखि फरार थिए ।
५६ वर्षीय सुनुवारले ३ कात्तिक २०४५ मा भुजिका १९ वर्षीय कमलबहादुर सुनुवारको हत्या गरी फरार भएका थिए । र, अदालतले १० वर्षको जेल सजाय सुनाएको थियो । उनीविरुद्ध मृतकका दाई भक्तबहादुर सुनुवारले जाहेरी दिएका थिए ।
भारतको सिलाङमा लामो समयदेखि लुकिछिपी बस्दै आएका उनलाई प्रहरीले पछ्याइरहेका थियो ।
प्रहरीले सुराकीको आधारमा उनी भुजीस्थित आफ्नै घरमा आएको मौका पारि शनिबार प्रहरीले उनलाई पक्राउ गरेको जिल्ला प्रहरी कार्यालय रामेछापका प्रहरी निरीक्षक राजेन्द्रकुमार थापाले जानकारी दिए ।
सुनुवारलाई आइतबार प्रहरीले जिल्ला अदालत रामेछापमा बुझाएको छ । र, उनी आजै जेल चलान भएका छन् ।