२६ माघ, काठमाडौं । करिब १६ वर्षअघि भएको एक हत्याकाण्डमा संलग्न आतिनी भन्ने मुखिया गुरुङलाई भारतले पक्राउ गरेर नेपाललाई बुझाएको छ ।
उनी २०१७ डिसेम्बर ८ मा भारतको जयपुरस्थित अन्तर्राष्ट्रिय विमानस्थलबाट बैंकक हुँदै मलेसिया जाने क्रममा पक्राउ परेका थिए । दिल्लीको पटियामा कोर्टको आदेशअनुसार भारतको विदेश मन्त्रालयले नेपाल प्रहरीलाई बुझाएको हो ।
उनलाई शुक्रबार नेपाल ल्याइएको छ । यो दुई देशबीच पहिलोपटक भएको वैध सुपुर्दगी हो । यसअघि दुई देशका प्रहरीले पक्राउ गरेका अपराधीहरुलाई गोप्य रुपमा बुझाउदै आएको थियो ।
गुरुङलाई १८ कात्तिक २०५८ मा ठमेलको डिस्कोमा १९ वर्षीय सुवर्ण गुरुङको हत्या गरेको अभियोगमा जिल्ला अदालत काठमाडौंले २०६४ पुस १ गते जन्मकैदको सजाय सुनाएको थियो । उनलाई जिल्ला अदालत काठमाडौंमा पेश गरिनेछ ।