८ साउन, रामेछाप। देशका विभिन्न जिल्लाका भूकम्प पीडितहरु आफ्नो निजी आवास निर्माणको काममा जुटिरहेका बेला रामेछाप नगरपालिका-८ भंगेरिका दशरथबाबु श्रेष्ठ भने कागजपत्रकै झमेलामा छन् ।
भूकम्पले श्रेष्ठको घर मात्र भत्किएन, घरले किचेर उनका ९३ वर्षीय बाबु जनक श्रेष्ठको मृत्युसमेत भयो ।
गएको०७२ सालमा गएको विनासकारी भूकम्पले रामेछाप जिल्लामा ४१ जनाको ज्यान गयो । तिनै मध्ये एक थिए दशरथबाबु श्रेष्ठका पिता जनक श्रेष्ठ । श्रेष्ठलाई वैशाख १२ गते आएको भूकम्पले उनी बसेको घरले किचेर ज्यान लियो ।
भूकम्पले घर भत्किएको पीडाभन्दा पनि वृद्ध बाबुलाई घर भत्किएर किच्दा ज्यान गएको पीडाले लामो समयसम्म सतायो ।
अहिले बाबुले ज्यान गुमाएको पीडा त छँदै छ, त्योसँगै अहिले भूकम्प पीडितको लाभग्राहीको सूचिमासमेत नाम नपरेको पीडा उनको छ ।
रामेछाप जिल्लामा करिव ५० हजार घर परिवार लाभग्राहीको सूचिमा पर्दा पनि घर भत्किएर बाबु गुमाएका दशरथबाबु श्रेष्ठ भूकम्प पीडितको सूचिमा परेनन् ।
पहिलो पटक नाम नआएपछि उनले गुनासो गरे । तर, उनको नाम आएन । फेरि गुनासो भरेपछि भने उनको नाम घर मर्मत गर्नेको सूचीमा निस्कियो ।
अहिले उनी भूकम्पले आफ्नो घर भत्किएको पुष्टि गर्ने कागजात र फोटोहरु बोकेर सरोकारवाला निकायमा धाइरहका छन् । तरपनि उनको गुनासो खासै सुनुवाई भएको छैन ।
‘घर भत्किएर बुवालाई किचेर ज्यान नै लियो । घर उतिबेलै भत्कियो । भत्किएको घरबाट नेपाली सेनाको टोली आएर लास निकाल्यो । अहिले बाँसको टहरो बारेर बसेका छौँ ।’ श्रेष्ठले भने, ‘घर भएपो मर्मत गर्नु । घरै छैन, घर मर्मत गर्नेका सूचीमा नाम निस्किएको छ ।’
