१७ असोज, काठमाडौं । कोटेश्वर र काँडाघारी प्रहरी प्रभागका ९ जना प्रहरी अधिकारी एकैदिन घुससहित अख्तियार दुरुपयोग अनुसन्धान आयोगको फन्दामा परेपछि रन्थनिएको काठमाडौं प्रहरीले मातहतको कार्यालयहरुमा शुद्धिकरण अभियान थालेको छ ।
अभियानको सुरुवात् स्वरुप बुधबार महानगरीय प्रहरी प्रभाग, नागढुंगाको इञ्चार्जबाहेक सम्पूर्ण प्रहरी युनिट नै परिवर्तन गरेको छ ।
एकैठाउँमा लामो समयदेखि बसिरहेका प्रहरी अधिकारीबाट गलत काम हुने गरेको आशंकामा प्रहरीले युनिट नै परिवर्तन गरेको हो ।
परिसरका प्रहरी नायब उपरीक्षक (डिएसपी) होमेन्द्र बोगटीका अनुसार मातहतका कार्यालयहरुमा लामो समयदेखि एकैठाउँ बसिरहेका प्रहरीहरुलाई परिवर्तन गर्ने क्रम थालिएको छ ।
‘हामीले अहिले नागढुंगामा महानगरीय प्रहरी कार्यालय, रानीपोखरी, काठमाडौं प्रहरी परिसर, टेकु र विभिन्न वृत्तबाट कर्मचारीहरु पठाइसकेका छौं’, बोगटीले अनलाइनखबरसँग भने, ‘अब यो शुद्धिकरण अभियान जारी रहन्छ ।’
