२४ असोज, डोटी । सुदूरपश्चिम प्रदेशका मुख्यमन्त्री त्रिलोचन भट्टले बुधबार बिहानै गौरीफन्टा सीमा नाकाको अनुगमन गरेका छन् ।
चाडपर्व मनाउन भारतबाट स्वदेश फर्किरहेका नेपालीहरु नाकामा ठगिने गरेको गुनासो बढेपछि मुख्यमन्त्री भट्ट आफैं नाकाको अनुगमनमा गएका हुन् ।
मुख्यमन्त्री भट्टले नाकामा स्वदेश फर्किरहेका नेपालीहरुसँग समेत भेटघाट गरेका छन् । घर फर्किंदा सीमामा हुने झन्झटको विषयमा पनि भट्टले नेपालीहरुसंग कुराकानी गरेका छन् ।
सीमा नाकामा नेपालीको आवागमन सहज बनाउन मुख्यमन्त्री भट्टले सीमा अनुगमन गरेको उनका स्वकीय सचिव शिवसिंह ओलीले जानकारी दिए ।
सीमामा नेपालीको आवागमन सहज पार्न कैलाली प्रशासनले पनि विशेष सतर्कता अपनाएको छ । प्रहरीले सीमा क्षेत्रमा हेल्प डेस्कको पनि स्थापना गरेको छ ।
