Comments Add Comment

गणित बोझ कि आवश्यकता ? किन धेरै विद्यार्थी फेल हुन्छन् ?

माध्यमिक तहको कक्षा ११ र १२ को नयाँ पाठ्यक्रम यसै वर्षदेखि लागू गर्ने तयारीमा रहेको सरकार चौतर्फी विरोध र आलोचना भएपछि पछि सरेको छ । यस वर्ष परीक्षणका रुपमा लागू गरी आगामी शैक्षिक सत्रबाट पूर्णरुपमा लागू गर्ने निर्णयमा सरकार पुगेको छ ।

तर, यस वर्ष कक्षा ११ को नयाँ पाठ्यक्रम कहाँ लागू गरिएको छ ? यसको जानकारी पाउन सकिएको छैन । नयाँ पाठ्यक्रमको विरोध गर्नेहरुले आ-आफ्नै किसिमले गरे होलान् तर यसमा गणित विषयलाई अनिवार्य नगरी इच्छाधीन गरिएकोमा यसका सरोकारवालाहरुबाट भएको विरोधले सबैको ध्यान तानेकै छ ।

पहिला पाठ्यक्रमको प्रारुप विज्ञान अन्तर्गत जीव विज्ञान समूहका विद्यार्थीहरुले समेत गणित पढ्न नपाउने गरी बाहिर ल्याइएको थियो । यस्तो प्रावधानले विद्यार्थीहरुको भविश्य बर्बाद गर्ने भन्दै विरोध भएपछि पाठ्यक्रम विकास केन्द्रले यसलाई सच्याइएको बताउँदैछ ।

तर, पाठ्यक्रम प्रारुपको अन्तिम रुप अहिलेसम्म सार्वजनिक भएको छैन । गणित सम्बन्धी यही बहसमा केन्दि्रत रही यहाँ केही चर्चा गरिएको छ ।

गणित कतिलाई आवश्यक कतिलाई अनावश्यक ?

शिक्षा मन्त्रीले कक्षा ११ र १२ मा अनिवार्य गणित हटाउनुको कारण दिँदै भनेका छन् ३० हजारलाई चाहिने गणित हटाएर ३ लाखको बोझ हटाएका छौं । यो तर्क आफैंमा हास्यास्पद छ । ०७४ सालको शिक्षा, विज्ञान तथा प्रविधि मन्त्रालयकै तथ्याङ्कलाई हेर्ने हो भने उच्च शिक्षामा गणित आवश्यक हुने विषयहरु विज्ञान, इञ्जिनियरिङका विद्यार्थीहरुको संख्या नै ५२ हजार ५ सय ५६ रहेको छ ।

शिक्षण सिकाइ क्रियाकलाप आदिमा भएका कमजोरीहरु हटाइ नतिजा सुधार्नेतिर लाग्नुको सट्टा हामी विषय नै हटाउनेतिर लाग्दै छौं यो भनेको गरिब मारेर गरीवको संख्या घटाउँछु भन्नुजस्तै हो

गणित नचाहिने भनिएको मानविकी, शिक्षा शास्त्र संकायमा जम्मा १ लाख २८ हजार ४ सय ४८ विद्यार्थीहरु भर्ना भएका देखिन्छन् । यी संकायअन्तर्गतका विषयहरुमा पनि गणित आफैं छ । त्यस अलवा अर्थशास्त्र, जनसंख्या अध्ययन जस्ता विषयहरुमा पनि गणित आवश्यक पर्छ । अरु गणित नचाहिने भनिएका विषयहरुमा पनि अनुसन्धानमा गणितीय ज्ञान आवश्यक पर्छ । अर्थशास्त्र, जनसंख्या जस्ता विषयहरुमा मात्र विद्यार्थीको संख्या जोड्ने हो भने यो प्रतिशत ७० को हाराहारीमा पुग्छ ।

यी विषयहरुका अलवा व्यवस्थापन, कृषि, फोरेष्ट्री, मेडिसिन आदिलाई पनि गणितको आवश्यकता पर्छ । यी विषयहरु पढ्नेको संख्या जोड्ने हो भने २ लाख २५ हजार ६ सय १५ हुन आउँछ । यो उच्च शिक्षामा भर्ना हुने कुल विद्यार्थींको ६३ प्रतिशत हाराहारी हो ।

पाठ्यक्रम आजलाई मात्र हेरेर बनाउने हैन, कम्तिमा पनि यसले आउँदो १०/१५ वर्षको जनशक्तिको आवश्यकता, विश्वव्यापी नवीन विषयहरुको प्रवाह आदिलाई ध्यान दिन जरुरी छ । विगतमा अत्यधीक विद्यार्थीहरु भर्ना हुने गरेको मानविकी संकायमा अत्यन्तै न्यून विद्यार्थीहरु भर्ना हुन थालेका छन् ।

शिक्षाशास्त्रमा पनि विद्यार्थीहरुको भर्ना दर पछिल्ला वर्षहरुमा कम हुदै गइरहेको छ । यी संकायहरुले पनि बीसीए, बीआइटी लगायत नयाँ नयाँ विषयहरु भित्र्याइरहेका छन्, जहाँ गणित अनिवार्य छ ।

यस तथ्याङ्कलाई हेर्ने हो भने लगभग ८० प्रतिशत विद्यार्थीहरुलाई गणित आवश्यक हुने देखिन्छ । अब मन्त्रीज्यूले भनेजस्तै ३० हजारलाई चाहिने गणित हटाएर ३ लाखको बोझ कम गरियो कि, ३ लाखलाई चाहिने गणित हटाएर ३० हजारका लागि मात्र गरियो ?

गणितमा धेरै फेल किन ? यसको समाधान के हो ?

गणित हटाउनुको अर्को कारण गणितमा एसईई परीक्षामा अधीक विद्यार्थीहरु अनुत्तीर्ण हुनु बताइएको छ । गणितमा विद्यार्थीहरु फेल हुनुमा विषय दोषी हुँदैन । गणितमा किन विद्यार्थीहरु फेल भए त्यसको कारण पत्ता लगाइ निराकरण गर्न लाग्नुपर्छ ।

विषयवस्तु मूल्याङ्कन, शिक्षण सिकाइ क्रियाकलाप आदिमा भएका कमजोरीहरु हटाइ नतिजा सुधार्नेतिर लाग्नुको सट्टा हामी विषय नै हटाउनेतिर लाग्दै छौं यो भनेको गरिब मारेर गरीवको संख्या घटाउँछु भन्नुजस्तै हो ।

गणितमा उत्तीर्ण दर बढाउन पनि कक्षा ११ र १२ मा गणित विषयलाई अनिवार्य गरिनुपर्दछ । यो तर्क सुन्दा अचम्म लाग्न सक्छ । तर, यसका पछाडि पुष्टि पनि छ । अहिलेको पाठ्यक्रम अनुसार कक्षा ९ र १० मा गणितीय विषयवस्तुहरु अधीक राखिएको छ । यो समस्या तल्ला कक्षाहरु पनि त्यतिकै छ ।

वालमनोविज्ञानलाई ख्यालै नगरिकन आवश्यक छ भन्ने नाममा अधीक विषयवस्तुहरु थोपर्नाले पनि विद्यार्थीहरुले जसरी रमाइ-रमाइ गणित पढ्नुपर्ने हो, त्यसरी पढ्न पाएका छैनन् ।

एउटा अभ्यासका समस्याहरुमा उचित धारणा नबनाइ नै नयाँ अभ्यास सुरु गर्नुपर्ने बाध्यता छ । जसले गर्दा उनीहरुले गणितीय ज्ञानलाई स्थायीरुपमा आत्मासाथ गर्न सकेका छैनन् । यो समस्याको हल गर्न पनि कक्षा ११ र १२ मा अनिवार्य गणितको व्यवस्था गरी तल्ला कक्षाहरुका कतिपय पाठ्यसामाग्रीहरु माथिल्ला कक्षाहरुमा समेट्नु पर्छ भने कक्षा ११ र १२ मा उच्च शिक्षामासबैलाई आवश्यक पर्ने गणितीय ज्ञानहरुलाई पनि समेट्नु पर्दछ । यसले गर्दा विषयवस्तुको बोझ कम हुन्छ र विद्यार्थीहरुलाई अभ्यासका लगानी चाहिने समय पर्याप्त हुन्छ ।

एसईई लगायतका परीक्षामा गणितमा बढी विद्यार्थीहरु अनुत्तीर्ण हुनुमा अर्को कारण हाम्रो मूल्याङ्कन पद्दति पनि हो । गणित बाहेक अरु सवै विषयहरुमा प्रयोगात्मक कक्षाको व्यवस्था गरिएको छ । त्यसैले ती विषयहरुको उत्तीर्ण दर बढी देखिन्छ ।

गणितमा प्रयोगात्मक कक्षा नै छैन । गणितमा प्रयोगात्मक कक्षाको व्यवस्था गर्ने हो भने यसले विद्यार्थीमा भएको ज्ञानलाई सवलीकरण गर्न मद्दत पुग्छ, जसले गर्दा उत्तीर्ण दर बढ्छ ।

अर्को समस्या, प्रश्न पत्र निर्माणमा पनि देखिएको छ । विद्यार्थीहरुले कहिले नदेखेका, विषय शिक्षकले नै धरैबेर धोत्लिनुपर्ने खालका समस्याहरु पनि परीक्षामा सोधिने गरिएको छ, जसले विद्यार्थीहरुलाई गणित गाह्रो बनाइरहेको छ । विद्यार्थीको सिर्जनशीलता त मापन गर्नुपर्छ । तर, यसको नाममा सोधिने यस्ता प्रश्नहरुले विद्यार्थीहरुलाई गणित विषय हाउगुजी बनाएको छ ।

प्रभावकारी शिक्षण सिकाइको प्रमुख तत्व शिक्षक हो । विषय वस्तुको उचित ज्ञानसहितका तालिम प्राप्त शिक्षकहरु विभिन्न कारणले गर्दा पर्याप्त रुपमा विद्यालयमा खटाउन सकिएको छैन, जसका कारण पनि अनुत्तीर्ण दर बढी छ । गणितको नतिजा सुधार्न यी र यस्तै अन्य कारणहरुको उचित निराकरण नगरी सरकार पास प्रतिशत बढाउने नाममा गणित विषयलाई विद्यालय तहको पाठ्यक्रमबाटै हटाउन लागिएको छ । शरीरको अंगमा घाउ लाग्यो भनेर निको पार्ने नाउमा शरीरको अंग नै काटेर फाल्न खोजिँदैछ । यसले शरीरबाट घाउ त फालिएला, तर भोलि अंग नभएको शरीरले कसरी काम गर्ने ? यतातिर ध्यान दिन जरुरी छ ।

(अधिकारी त्रिविका उपप्राध्यापक हुन्)

यो खबर पढेर तपाईलाई कस्तो महसुस भयो ?

ट्रेन्डिङ

Advertisment