४ मंसिर, काठमाडौं । नवलपुरको गैंडाकोटमा गएराति भएको छुट्टा–छुट्टै ३ सवारी दुर्घटनामा १ जनाको मृत्यु भएको छ भने ७ जना घाइते भएका छन् । घाइतेमध्ये ३ को अवस्था गम्भीर छ ।
पूर्व–पश्चिम राजमार्गअन्तर्गत गैंडाकोटको खत्रिफिडनजिकै दुई अटो एक आपसमा ठक्कर खाँदा लमजुङ घर भएकी लुरी सार्कीको मृत्यु भएको हो । दुर्घटनामा घाइते उनको उपचारका क्रममा नयाँ मेडिकल कलेज भरतपुरमा गएराति १० बजे मृत्यु भएको इलाका प्रहरी कार्यालय, गैंडाकोटले जनाएको छ ।
त्यसैगरी, गैंडाकोटकै सडक दस्तुर लिने ढाटनजिकै एच आर ३८ यु ९७८१ नम्बरको भारतीय कन्टेनरले ना ३ च ८४१५ नम्बरको बोलेरो जिपलाई ठक्कर दिँदा ४ जना घाइते भएका छन् । घाइतेमध्ये एक जना सामान्य उपचारपछि घर फर्किएका छन् भने अन्य ३ जनाको नयाँ मेडिकल कलेज भरतपुरमा उपचार भइरहेको प्रहरीले जनाएको छ ।
यता कावासोती नगरपालिका–१५, बरौली टोलस्थित भित्री सडक खण्डमा लु ४० प २३३३ को मोटरसाइल र विपरीत दिशाबाट आइरहेको ना २३ प ७८७१ नम्बरको मोटरसाइकल आपसमा ठोक्किँदा ३ जना गम्भीर घाइते भएका छन् ।
घाइते हुनेहरुमा कावासोती १२ का राजु गुरौ, कावासोती–१४ का समिल थापा मगर र सोही स्थानका वीरेन्द्र महतो रहेको जिल्ला प्रहरी कार्यालय नवलपुरले जनाएको छ । उनीहरुलाई उपचारका लागि भरतपुर अस्पताल लगिएको छ ।
– विजय चालिसेबाट
