पुननिर्माण प्राधिकरणको दावी : ७७ प्रतिशत निजी घर पुनर्निर्माण

१० पुस, काठमाडौं । राष्ट्रिय पुननिर्माण प्राधिकरणले भूकम्पमा क्षति भएका ७७ प्रतिशत निजी घर निर्माण भएको बताएको छ ।

प्राधिकरणले मंगलबार गरेको पत्रकार सम्मेलनमा घर पुननिर्माणका लागि अनुदान सम्झौता गरेका ७ लाख ४२ हजार १ सय ३५ घरमध्ये ३ लाख ३७ हजार ३ सय १९ घर निर्माण भइसकेको र २ लाख ३३ हजार ३ सय ४३ घर निर्माणको चरणमा रहेको जानकारी दिएको हो ।

प्राधिकरणका अनुसार अनुदान सम्झौता गरेका ७ लाख ४२ हजारको ४५ प्रतिशत घरधुरीले घर निर्माण पूरा गरिसकेका र ३२ प्रतिशत घर निर्माणको चरणमा रहेका हुन् ।

दुबै जोड्दा ७७ प्रतिशत घरहरु निर्माण भएका प्राधिकरणका प्रमुख कार्यकारी अधिकृत सुशील ज्ञवालीले जानकारी दिए । निर्माण सम्पन्न र निर्माणाधीन घरको संख्या ५ लाख ७० हजार ६ सय ६२ रहेको छ ।

प्राधिकरणले भूकम्पमा क्षति भएका व्यक्तिगत घर संख्या ८ लाख ८४ हजार ८ सय वटा पहिचान गरेको छ । जसमा पुनर्निर्माण लाभग्राही ८ लाख २२ हजार ९०९ र प्रवलीकरणमा परेका लाभग्राहीको संख्या ६१ हजार ८ सय ९१ रहेको छ ।