१३ फागुन, काठमाडौं । आर्सनलले इंग्लिस प्रिमियर लिग फुटबलमा सहज जित हात पारेको छ ।
आइतबार राति आफ्नै मैदानमा भएका खेलमा आर्सनलले साउथहृयाम्पटनलाई २-० गोलअन्तरले पराजित गरेको हो । आर्सनलको जितमा हेनरिख खितरयान र एलेक्जेन्डर लेकाजेटले समान १-१ गोल गरे ।
आर्सनलले दुबै गोल पहिलो हाफमा गरेको थियो । खेलको छैटौं मिनेटमा नै लेकाजेटले गोल गर्दै आर्सनललाई अग्रता दिलाएका थिए । त्यस्तै, १७ औं मिनेटमा हेनरिखले गोल गर्दै आर्सनललाई २-० गोलको अग्रता दिलाए ।
पहिलो हाफमा नै दोब्बर गोलअन्तरले अग्रता बनाएको आर्सनलले दोस्रो हाफमा आफ्नो अग्रतालाई कायमै राख्दै जित हात पारेको हो ।
आइतबार राति नै भएको अर्को खेलमा लिगको शीर्ष स्थानमा रहेको लिभरपुललाई म्यान्चेस्टर युनाइटेडले गोलरहित बराबरीमा रोकेको छ ।
लिगको शीर्ष स्थानमा रहेको लिभरपुलको २७ खेलबाट ६६ अंक छ । दोस्रो स्थानमा रहेको म्यान्चेस्टर सिटीको समान खेलबाट ६५ अंक छ ।
लिगको तेस्रो स्थानमा रहेको टोटनहृयामको ६० अंक हुँदा २७ खेलबाट ५३ अंक बनाएको आर्सनल लिगको चौथो स्थानमा छ ।
