३० फागुन, ओमान । ओमानको राजधानी मस्कटस्थित नेपाली दूतावासले अन्तर्राष्ट्रिय नारी दिवसको सन्दर्भमा विशेष कार्यक्रमको आयोजना गरेको छ ।
राजदूत शर्मिला पराजुली ढकालको निवासमा बुधबार आयोजना गरिएको कार्यक्रममा ओमानको राजपरिवारकी सदस्य सैदा बस्मा ल सइदसहित विभिन्न पेसामा आबद्ध करिव १०० जनाको उपस्थिति रहेको दूतावासले जनाएको छ ।
कार्यक्रममा राजदूत ढकालले नेपाल सरकारले लैङ्गिक समानता सुनिश्चित गर्न चालेको कदमहरूका बारे आगन्तुकहरूलाई जानकारी दिएकी थिइन् । राष्ट्रपति विद्यादेवी भण्डारीको जारी अमेरिका भ्रमण र उनले राष्ट्रसंघमा हालै दिएको अभिव्यक्तिका बारे पनि उनले चर्चा गरेकी थिइन् ।
ओमान राजपरिवारकी सदस्य सैयदले महिलाहरूले लैङ्गिक समानताका लागि काम गर्न र समाजलाई केही योगदान गर्न आग्रह गरिन् ।
कार्यक्रममा विभिन्न देशका राजदूत तथा ओमानमा कार्यरत नेपाली महिलाहरूको उपस्थिति रहेको दूतावासले जनाएको छ ।
