२२ चैत, काठमाडौं । खेलकुद पत्रकारहरुको छाता संगठन नेपाल खेलकुद पत्रकार मञ्चको अध्यक्षमा दुर्गानाथ सुवेदी ( देवेन्द्र) निर्वाचित भएका छन् ।
शुक्रबार भएको १५ औं चुनावी सभाले सुवेदीको नेतृत्वमा नयाँ कार्यसमिति चयन गरेको हो ।
सुवेदीले अर्का उम्मेदवार प्रकाश तिमिल्सिनालाई १४ मतान्तरले पराजित गरेका छन् । अध्यक्षमा निर्वाचित सुवेदीले ५५ मत पाउँदा तिमिल्सिनाले ४१ मत पाएका छन् ।
त्यस्तै, प्रथम उपाध्यक्षमा भने संजीव शिल्पकार निर्विरोध निर्वाचित भएका छन् ।
उपाध्यक्षमा भने ध्रुब तुलाधरले ७१ र निरञ्जन अधिकारीले ५७ मत प्राप्त गर्दै निर्वाचित भएका छन् । यता, पराजित श्रीलोचन राजोपाध्यायले भने ४१ मत पाएका थिए ।
महासचिवमा भने प्रज्वल ओली निर्वाचित भएका छन् । उनले ६३ मत पाए । पराजित भएका पवन आचार्यले भने ३३ मत पाए ।
त्यस्तै, सचिवमा गोविन्द रेग्मीले ५८ मत प्राप्त गर्दै विजयी भए । उनका प्रतिद्वन्द्वी आदर्श ढकालले ३८ मत ल्याए । कोषाध्यक्षमा अन्जन खड्का निर्विरोध निर्वाचित भए ।
महिला सदस्यमा मुना कार्की निर्विरोध निर्वाचित हुँदा खुलातर्फ दिल तामाङले ५०, हिमबिक्रम केसीले ४४ र अनिल मल्ल ठकुरीले ३६ मत प्राप्त गर्दै विजयी भएका छन् ।
