८ वैशाख, काठमाडौं । काठमाडौंको रानीबारीमा गत २६ चैतमा भएको डकैती घटनामा संलग्न ३ जनालाई प्रहरी पक्राउ गरेको छ ।
घटनामा संलग्न चन्द्रागिरिका नवराज तामाङ, विक्रम श्रेष्ठ र नुवाकोटका दिपेश भनिने सन्तबहादुर तामाङ पक्राउ परेका हुन् ।
महानगरीय अपराध अनुसन्धान महाशाखाको टोलीले उनीहरुलाई पक्राउ गरेको अनुसन्धान थालेको महाशाखाका प्रमुख एसएसपी धिरजप्रताप सिंहले बताए ।
उनका अनुसार पक्राउ परेका ३ जनाले रानीबारीमा लालेन्द्र शेरचन, उनकी श्रीमती भानुदेवी र घरको रेखदेख गर्ने मिठु थकालीसहित ३ जनालाई हातखुट्टा बाँधेर लुटपाट गरेका थिए ।
‘जुटको डोरीले बाँधेर कोठामा रहेको दराज फुटाई तोडफोड गरेर गरगहना र नगदसहित गरी ५ लाख ६० हजार बराबरको धनमाल लुटपाट भएको थियो’, सिंहले भने ।
प्रहरीले उनीहरुको साथबाट सुनको तिलहरी, बा२ज ३०६१ नम्बरको ट्याक्सी र बा ३ च ७१६४ नम्बरको जीप पनि बरामद गरेको छ ।
