२७ जेठ, काठमाडौं । ब्राजिलले अन्तर्राष्ट्रिय मैत्रिपूर्ण फुटबल खेलमा होन्डुरसलाई फराकिलो अन्तरले पराजित गरेको छ ।
कोपा अमेरिका कपको तयारीमा रहेको ब्राजिलले होन्डुरसलाई ७–० गोल अन्तरले पराजित गरेको हो । ब्राजिलको जितमा गाब्रियल जेसुसले दुई गोल गरे । त्यस्तै, सिल्भा, काउटिन्हो, नेरस क्याम्पोस, फिर्मिन्हो र रिचारलिसनले समान १–१ गोल गरे ।
खेलको छैटौं मिनेटमा नै जेसुसले गोल गरेपछि ब्राजिलले अग्रता बनाएको थियो । त्यस्तै, १३ औ मिनेटमा सिल्भाले गोल गर्दै ब्राजिललाई २–० गोलको अग्रता दिलाए । दुई गोलअन्तरले पछि परेको होन्डुरसलाई खेलको २९औं मिनेटमा अर्को झड्का लाग्यो । रोमेल क्विटोले रेड कार्ड खाँदै मैदान छोडेपछि होन्डुरस १० खेलाडीमा सीमित भएको थियो ।
त्यसपछि खेलको ३७ औं मिनेटमा काउटिन्होले गोल गर्दै ब्राजिललाई ३–० गोलको अग्रता दिलाए । पहिलो हफमा ३–० गोलको अग्रता बनाएको ब्राजिलले दोस्रो हाफमा थप चार गोल गर्न सफल भयो । खेलको ४७औं मिनेटमा जिससले गोल गर्दा ५६ औ मिनेटमा क्यापोसले गोल गर्दै ब्राजिललाई ५–० गोलको अग्रता दिलाए । त्यस्तै, ब्राजिलका लागि ६५ औ मिनेटमा फिर्मिन्होले र रिचारलिसनले ७० औं मिनेटमा गोल गर्दै ७–० गोलको जित दिलाए ।
त्यस्तै, अन्य मैत्रीपूर्ण खेलमा अमेरिका भेनेजुएलासँग ३–० गोलको हार ब्यहोर्दा कोलम्बियाले पेरुलाई ३–० गोलअन्तरले नै पराजित गरेको छ ।
