२२ भदौ, काठमाडौं । नदेज्दा कप महिला फुटबलमा आयोजक कीर्गिस्तानविरुद्धको खेलमा नेपालले पहिलो हाफ सकिँदा ६–२ को अग्रता लिएको छ ।
नेपालका लागि सावित्रा भण्डारीले ह्याट्रिक गरिन् । उनले चौथो, १५ औं र ३० औं मिनेटमा गोल गरिन् ।
सावित्राले चौथो र १५ औं मिनेटमा गोल गरेपछि कीर्गिस्तानले पनि १९ औं र २२ औं मिनेटमा गोल फर्काएर खेल बराबरीमा ल्यायो । त्यसपछि २५ औं मिनेटमा दीपा राई, ३० औंं मिनेटमा सावित्रा भण्डारी, ३४ औं मिनेटमा अनिता बस्नेत र ३७ औं मिनेटमा निरु थापाले गोल गरे ।
प्रतियोगितामा कीर्र्गिस्तानसँगै नेपाल, उब्जेकिस्तान र ताजिकिस्तान सहभागी छन् । यो प्रतियोगितालाई नेपालले १३ औं दक्षिण एसियाली खेलकुद प्रतियोगिता (साग) को तयारीको रुपमा लिएको छ ।