१ असोज, काठमाडौं । मुख्य चाडपर्व नजिकिँदै गर्दा हरियो तरकारीमा अस्वभाविक मूल्य वृद्धि भएको छ । आलु, प्याज, बोडी, करेला जस्ता तरकारीको मूल्य बढ्दा आम उपभोक्ता मारमा परेका छन् ।
भदौ २५ गते ३८ रुपैयाँ किलो थोक बिक्री भएको तनेबोडीको मूल्य असोज १ गते ९८ रुपैयाँ पुगेको छ । यस्तै, सोही दिन ३३ रुपैयाँमा बिक्री भएको तिते करेला एक सातामै १३६ प्रतिशतले बढेर ७८ रुपैयाँ पुगेको छ । ३३ रुपैयाँ किलोको घिरौला पनि सातौ दिनमा ७८ रुपैयाँ थोक मूल्य पुगेको छ ।
रातो आलुको मूल्य एक सातामै ४३ रुपैयाँबाट बढेर ५८ रुपैयाँ किलो पुगेको छ । एक साताअघि प्रतिकिलो ५९ रुपैयाँमा थोक बिक्री भइको सुकेको प्याजको मूल्य ८९ रुपैयाँ पुगेको छ ।
कालिमाटी तरकारी तथा फलफूल बजारमा सरदर दैनिक ५४ प्रकारका तरकारी तथा फलफूलको खरिद-बिक्री हुन्छ । पछिल्लो
एक सातामा यिनीहरुमध्ये अधिकांशको भाउ बढेको छ । दैनिकरुपमा हरेकजसो भन्सामा पाक्ने आलु, प्याज, हरियो खुर्सानीजस्ता तरकारीको मूल्य थोकमा ह्वात्तै बढेको छ ।
गोलभेडाको मूल्य भने यो साता घट्दो क्रममा देखिएको छ । नेपाली ठूलो गोलभेडा प्रतिकिलो ७ रुपैयाँ, नेपाली सानो ६ रुपैयाँ र भारतीय गोलभेडाको मूल्य भने स्थीर छ ।
कालिमाटी तरकारी तथा फलफूल व्यवसायी संघले भने तरकारीको मूल्य नबढेको दावी गरेको छ । संघका अध्यक्ष भरत खतिवडाले तरकारीको मूल्य बढेको कुरा अफबाह भएको बताए । व्यवसायीलाई गलत देखाउन मूल्य बढेको हल्ला गरिएको उनको दावी छ । ‘पानी परेका कारण सडक अबरुद्ध छ । बजारमा तरकारी अभाव भयो होला तर मूल्य बढेको छैन,’ खतिवडाले भने ।
यता कालीमाटी तरकारी तथा फलफूल बजार विकास समितिले भने वर्षाकै कारण तरकारीको मूल्य बढेको जनाएको छ । प्याजको मूल्य भारतमै बढेका कारण नेपालमा असर परेको र अन्य तरकारी आवश्यक मात्रामा बजारमा नआएको एवं आएका पनि कृषकले नै बढी मूल्य लिएको पाइएको समितिका उप निर्देशक तथा प्रवक्ता बिनय श्रेष्ठले बताए ।
एकाध तरकारीहरुको मौसमी उत्पादन सकिन थालेका कारण पनि मूल्य बढ्न गएको हुन सक्ने उनको आशंका छ । थोकमै मूल्य बढेपछि खुद्रा पसलमा झनै मूल्य बढेको उपभोक्ताहरु बताउँछन् ।
मूल्य बढेका तरकारीको सूची
कृषि उपज | इकाइ | न्यूनतम | अधिकतम | औसत |
आलु रातो | के.जी. | ४३ | ५९ | ३७.२१ |
आलु रातो(भारतीय) | के जी | २६ | ३३ | २६.९२ |
आलु रातो(मुडे) | केजी | ४३ | ४९ | १३.९५ |
आलु सेतो | के.जी. | ३१ | ३८ | २२.५८ |
प्याज सुकेको | के.जी. | ५९ | ८९ | ५०.८५ |
गाजर(लोकल) | के.जी. | ९८ | ९८ | ०.०० |
बन्दा(लोकल) | के.जी. | ४२ | ४८ | १४.२९ |
काउली स्थानिय | के.जी. | ७८ | १३८ | ७६.९२ |
मूला सेतो(लोकल) | के.जी. | ३८ | ४२ | १०.५३ |
बोडी(तने) | के.जी. | ३८ | ९८ | १५७.८९ |
तितो करेला | के.जी. | ३३ | ७८ | १३६.३६ |
लौका | के.जी. | २८ | ४८ | ७१.४३ |
परवर(लोकल) | के.जी. | ३८ | ३८ | ०.०० |
घिरौला | के.जी. | ३३ | ७८ | १३६.३६ |
हरियो फर्सी (डल्लो) | केजी | ३८ | ५८ | ५२.६३ |
भिण्डी | के.जी. | ४८ | ६८ | ४१.६७ |
स्कूस | के.जी. | २२ | २८ | २७.२७ |
च्याउ(कन्य) | के.जी. | १४५ | १५५ | ६.९० |
च्याउ(डल्ले) | के जी | ४९० | ४९५ | १.०२ |
काक्रो(लोकल) | के.जी. | ६० | ५५ | -८.३३ |
लप्सी | के.जी. | ४५ | ४८ | ६.६७ |
अदुवा | के.जी. | २२५ | १९५ | -१३.३३ |
खु्र्सानी सुकेको | के.जी. | २९० | ३४५ | १८.९७ |
खु्र्सानी हरियो | के.जी. | ७८ | ९८ | २५.६४ |