Comments Add Comment

गृहमन्त्रीका भाइ नरेशलाई १ लाख रूपैयाँ धरौटीमा छाड्न आदेश

३१ भदौ, काठमाडौं । अपराधिक लाभ (एक्सटर्सन) र संगठित अपराध सम्बन्धी कसूरका आरोपित गृहमन्त्री रामबहादुर थापा ‘बादल’ का भाइ नरेशलाई थुनामुक्त गर्न अदालतले आदेश दिएको छ ।

जिल्ला अदालत, काठमाडाैंका न्यायाधीश मेदनीप्रसाद पौडेलको इजलासले उनलाई एक लाख रुपैयाँ धरौटीमा छाड्न आदेश दिएको हो । अदालतका श्रेस्तेदार आनन्दप्रसाद श्रेष्ठले थापालाई छाड्न आदेश दिएको पुष्टि गरे । उनले भने, ‘अन्य प्रतिवादीलाई पुर्पक्षका लागि थुनामा पठाउने आदेश भएको छ ।’

प्रकरणमा थापासँगै पवन खड्का, समिरमानसिंह बस्न्यात, सुरेन नगरकोटी बलामी,  जे भन्ने जावेद अनवर दिन, शैलेश प्रजापती, विनोद लामा, विरवल भट्टराई र प्रवेश भन्ने मनबहादुर पुन मगरलाई प्रतिवादी बनाएर मुद्दा दायर भएको थियो । उनीहरुमध्ये जावेद अझै फरार छन् भने बस्न्यात केन्द्रीय कारागार, सुन्धारामा छन् ।

मंगलबारै आदेश आउने भनिए पनि वकिल धेरै भएका कराण थुनछेक बहस नसकिएपछि बुधबार मात्रै आदेश आएको हो ।

अदालतको आदेशपछि नरेशलाई थुनामुक्त गर्न कागजी प्रक्रिया पूरा गरिँदैछ । ‘उहाँले रकम जम्मा गर्दै हुनुहुन्छ’, श्रेष्ठले अनलाइनखबरसँग भने ।

गुण्डा नाइके समिरमान सिंह बस्न्यातका दुई सहयोगी पवन खड्का र सुरेन नगरकोटीको नरेशसँग सम्बन्ध देखिएपछि उनलाई केन्द्रीय अनुसन्धान ब्युरो (सीआईबी) ले पक्राउ गरेको थियो ।

तर, उनी अस्वस्थताको कारण देखाउँदै वसुन्धरास्थित चिरायु अस्पतालमा राखिएका थिए ।

अदालतमा बयानका क्रममा थापाले बस्न्यातसँग आफ्नो चिनजान नभएको दाबी गरेका थिए भने उनलाई नभेटेको पनि बताएका थिए ।

यो पनि पढ्नुहोस गृहमन्त्रीको ‘ग्रिन सिग्नल’पछि पक्राउ परेका हुन् साइला भाइ

पछिल्लो केही महिनायता उपत्यकाका निर्माण व्यवसायीलाई निश्चित रकम तोकेर नदिए गोली हानी हत्या गरिएका शरदकुमार गौचनको हालत बनाइदिने भन्दै धम्की आउने गरेको थियो । त्यो धम्की जेलमा रहेका गुण्डा नाइके समिरमानको योजनामा आएको प्रहरी निष्कर्ष थियो । त्यसैले उनलाई मुस्ताङ कारागारमा सरुवा गर्न खोजिएको थियो ।

तर, समिरकी श्रीमती माया र दाइ सुधिरमानले अदालतले रिट हालेपछि उनको सरुवा रोकिएको थियो ।

समूहका सदस्य पक्राउ परे छुटाउन सहयोग गरिदिने अपेक्षामा समूहमा गृहमन्त्रीका भाइ नरेशलाई प्रयोग गरेको देखिएको प्रहरी दाबी थियो । तर, अदालतले उनको प्रकरणमा संलग्नता देखिने स्पष्ट प्रमाण अभाव भएको जिकिर गरेको छ ।

निर्माण व्यवसायी महासंघका पूर्वअध्यक्ष जयराम लामिछानेले जाेहरी दिएपछि ब्युरोका डीएसपी निरञ्जन दत्त भट्टले गरेको अनुसन्धान प्रतिवेदनका आधारमा मुद्दा अदालतसम्म पुगेको थियो ।

यो पनि पढ्नुहोस जेलबाटै सुरक्षा चुनौतीः गृहमन्त्रीलाई चिठी, सञ्चार उद्यमीलाई ‘थ्रेट’

यो खबर पढेर तपाईलाई कस्तो महसुस भयो ?

Advertisment