१८ पुस, काठमाडौं । १३ औं दक्षिण एसियाली खेलकुद सागमा दुई स्वर्ण जितेका युवा गल्फर सुवास तामाङले जुनियर फाल्डो सिरिज गल्फको उपाधि जितेका छन् ।
साविक विजेता समेत रहेका सुवाससहित तीन खेलाडी नेपालबाट सिरिजका लागि छनोट भएका छन् ।
गोकर्ण गल्फ क्लबमा शुक्रबार सुवासले २ अण्डर ७० स्कोर बनाएपछि कुल ११ अण्डर २०५ स्कोरसहित उपाधि जितेका हुन् । सुवासले १३ औं सागका व्यक्तिगत र टिम इभेन्टमा स्वर्ण जितेका थिए ।
गर्ल्सतर्फ कश्मिरा शाहले उपाधि जितिन् । यस्तै १२ देखि १६ वर्ष उमेर समूहको उपाधि सद्भाव आचार्यले जिते ।
उपाधि जितेका सुवास, सद्भाव र कश्मिरा भियतनामको लगुना लङ दानङ गल्फ कोर्षमा सन् २०२० मा हुने फाल्डो सिरिजको फाइनल चरणका लागि छनोट भएका छन् ।
नेपाल गल्फ एसोसिएसनले आयोजना गरेको सिरिजमा १२ देखि २१ वर्ष सम्मका १६ खेलाडीले प्रतिस्पर्धा गरेका थिए ।
