५ फागुन, काठमाडौं । निवर्तमान उपसभामुख शिवमाया तुम्बाहाङ्फे कानूनमन्त्री बन्ने भएकी छन् ।
तुम्बाहाङ्फेले आजै दिउँसो साढे ३ बजे राष्ट्रपतिसमक्ष कानून, न्याय तथा संसदीय मामिला मन्त्रीको शपथ लिँदैछिन् ।
तुम्बाहाङ्फेले आज कानून मन्त्रीको शपथ लिने प्रधानमन्त्री केपी शर्मा ओलीका प्रेस सल्लाहकार सूर्य थापाले अनलाइनखबरलाई जानकारी दिए ।
सरकारबाट समाजवादी पार्टीको वहिर्गमनपछि रिक्त रहेको कानून मन्त्रालयको जिम्मेवारी स्वास्थ्य मन्त्री भानुभक्त ढकालले सम्हाल्दै आएका छन् ।
समाजवादी पार्टीले सरकार छाडेपछि कानून मन्त्रालयसँगै सहरी विकास मन्त्रालय पनि खाली छ । कानून मन्त्रालय पूर्वएमालेले पाएको छ ।
निवर्तमान सभामुख कृष्णबहादुर महरामाथि बलात्कार प्रयास आरोप लागेपछि उनले राजीनामा दिएका थिए । त्यसपछि सभामुख पदमा शिवमायाले पनि दावी गरेकी थिइन् ।
तर नेकपाले उनलाई उपसभामुखबाट राजीनामा गर्न लगाएको थियो ।
उपसभामुखबाट राजीनामा दिएपछि उनी नेकपा केन्द्रीय सदस्यमा मनोनीत भएकी छन् ।
