काठमाडौं । इटालियन क्लब युभेन्ट्सका मिडफिल्डर ब्लेस माटुइडीलाई पनि कोरोना भाइरसको संक्रमण देखिएको छ ।
विश्वभर फैलिरहेको कोरोनाको संक्रमण देखिएका उनी युभेन्ट्सका दोस्रो खेलाडी हुन् । यसअघि युभेन्ट्सका ड्यानिए रुगानीलाई पनि कोरोना संक्रमण भएको थियो ।
इटालियन क्लब युभेन्ट्सले मटुइडीलाई कोरोना भाइरस पोजिटिभ देखिएको जनाएको छ । ३२ वर्षीय मटुइडी मार्च ११ देखि आइसोलेसनमा रहेको युभेन्ट्सले जनाएको छ ।
चीनको वुहानबाट गत डिसेम्बरको अन्तिम साताबाट सुरु भएको कोरोना अहिले विश्भर फैलिएको छ । यसमा पनि युरोपका देशहरू यसबाट सबैभन्दा धेरै प्रभावित छन् । इटलीमा अप्रिल ३ सम्मका लागि सम्पूर्ण खेलकुद गतिविधिहरु पनि रोकिएको छ ।
